Operacioni “Heshtja”, Prokuroria: Do të kërkohet paraburgim për të arrestuarin e fundit, dyshohet për narkotik

Prokuroria Themelore në Prishtinë ka dhënë detaje të reja lidhur me operacionin policor “Heshtja”, në kuadër të të cilit janë arrestuar disa persona, përfshirë ish-ministrin e Kulturës, Astrit Haraqija. Pas arrestimit të një personi tjetër më 17 nëntor, Prokuroria ka konfirmuar për lajmi.net se i dyshuari është ndaluar për 48 orë, nën dyshimin për kryerjen…

Lajme

18/11/2026 10:38

Prokuroria Themelore në Prishtinë ka dhënë detaje të reja lidhur me operacionin policor “Heshtja”, në kuadër të të cilit janë arrestuar disa persona, përfshirë ish-ministrin e Kulturës, Astrit Haraqija.

Pas arrestimit të një personi tjetër më 17 nëntor, Prokuroria ka konfirmuar për lajmi.net se i dyshuari është ndaluar për 48 orë, nën dyshimin për kryerjen e veprës penale që lidhet me blerjen, posedimin, shpërndarjen dhe shitjen e paautorizuar të narkotikëve.

“Referuar kërkesës suaj, ju njoftojmë se me urdhër të Prokurorit të Shtetit, është ndaluar një (1) person për 48 orë, nën dyshimin për kryerjen e veprës penale ‘Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge’, nga neni 267 lidhur me nenin 275 të Kodit Penal të Republikës së Kosovës”, thuhet në përgjigjen e Prokurorisë për lajmi.net.

Prokuroria ka bërë të ditur se ndaj të dyshuarit do të kërkohet edhe caktimi i masës së paraburgimit.

“Gjithashtu, lidhur me rastin ju njoftojmë se Prokurori i Shtetit, brenda afatit ligjor, pranë gjykatës kompetente do të parashtrojë kërkesën për caktimin e masës së paraburgimit ndaj të pandehurit”, thuhet tutje në përgjigje.

Kujtojmë se operacioni “Heshtja” ishte realizuar më 14 nëntor në rajonin e Prishtinës, në kuadër të hetimeve për veprat penale që lidhen me narkotikët.

Në këtë rast, Gjykata Themelore në Prishtinë kishte caktuar masën e paraburgimit prej një muaji ndaj ish-ministrit Astrit Haraqija, Jeton Stanovcit, Gëzim Fekës, Arjanit Beqirit, Albana Xhemajli-Ramadanit dhe Alban Malokut.

Ndërkohë, Policia e Kosovës ka njoftuar se gjatë veprimeve të fundit hetimore janë sekuestruar edhe tri vetura.

Hetimet lidhur me operacionin “Heshtja” po vazhdojnë./Lajmi.net/