Deklarata skandaloze e ministres serbe për Administratë Publike dhe Vetëqeverisje Lokale, Snezhana Paunoviq, se po të ishte në vend të ish-presidentit jugosllav Slobodan Millosheviq në vitin 1998 do ta kishte “spastruar etnikisht Kosovën”, ka nxitur reagime të ashpra në Kosovë, Bashkimin Evropian dhe Shqipëri.

Paunoviq, në një intervistë për televizionin serb Kurir, deklaroi se “po të ishte në vend të Millosheviqit”, do ta kishte kryer spastrimin etnik të Kosovës, duke shtuar më vonë se nuk e kishte fjalën për “likuidimin e shqiptarëve”, por që “secili që ndihej më pak qytetar i Republikës Federale të Jugosllavisë, të largohej dhe të shkonte në shtetin e vet amë”.

Më pas, përmes një reagimi në rrjetet sociale, ajo bëri të ditur se nuk tërhiqet nga qëndrimet e saj.

“Ne jemi partia që e udhëhoqi Serbinë në rrethana jashtëzakonisht të vështira historike, partia që bëri sakrifica të mëdha – emri i së cilës është përmendur më së shumti në Hagë.”

Bashkimi Evropian: Nuk ka vend për retorikë që promovon spastrimin etnik

Zëdhënësja e Komisionit Evropian, Anitta Hipper, deklaroi se edhe pse BE-ja nuk komenton deklarata individuale, mesazhe të tilla janë të papranueshme.

“Deklarata të tilla bien ndesh me vlerat e dinjitetit njerëzor, pajtimit, llogaridhënies dhe marrëdhënieve të mira fqinjësore, mbi të cilat është ndërtuar Bashkimi Evropian.”

Ajo shtoi se deklarata të tilla janë në kundërshtim edhe me obligimet që Serbia ka marrë në kuadër të dialogut për normalizimin e marrëdhënieve me Kosovën.

“Ne presim që të gjithë liderët të veprojnë me përgjegjësi, të përmbahen nga retorika nxitëse dhe të kontribuojnë në krijimin e një klime besimi dhe stabiliteti rajonal.”

Edhe komisionarja evropiane për Zgjerim, Marta Kos, reagoi ashpër.

“Për deklarata të tilla mund të ketë vetëm tolerancë zero. Në Evropë nuk ka vend për retorikë që arsyeton, promovon apo madhëron spastrimin etnik. Personalisht, jam vërtet e tmerruar që në këtë kohë duhet të flasim ende për gjëra të tilla.”

Ajo shprehu shpresën se deklarata përfaqëson një qëndrim individual dhe jo politikën zyrtare të Qeverisë së Serbisë.

Konjufca: Heshtja nuk është një opsion

Ministri në detyrë i Punëve të Jashtme dhe Diasporës, Glauk Konjufca, tha se deklarata e ministres serbe glorifikon krimet e luftës dhe bie ndesh me rrugën evropiane.

“Retorika e tillë i lavdëron krimet e luftës, kërcënon stabilitetin rajonal dhe është krejtësisht e papajtueshme me vlerat evropiane, si dhe me të ardhmen evropiane.”

Ai kërkoi reagim të prerë nga Bashkimi Evropian.

“Heshtja nuk është një opsion. As përgjigjet e dobëta nuk janë. Nivelet më të larta të lidershipit të BE-së duhet të përgjigjen me një dënim të qartë publik, t’i kujtojnë Serbisë detyrimet e saj dhe të sigurohen që një sjellje e tillë të ketë pasoja në procesin e saj të pranimit.”

Sipas Konjufcës, Kosova mbetet e përkushtuar ndaj demokracisë, shoqërisë shumëetnike dhe pajtimit të bazuar në të vërtetën dhe drejtësinë.

Eurodeputeti Sandro Gozi kërkon shkarkimin e ministres

Sekretari i përgjithshëm i Partisë Demokratike Evropiane dhe deputeti në Parlamentin Evropian, Sandro Gozi, i cilësoi deklaratat e Paunoviqit si “skandaloze” dhe “krejtësisht të papranueshme”.

“Pohimi i saj se do ta kishte spastruar etnikisht Kosovën përbën një mbështetje të hapur për dëbimin e detyruar, përndjekjen dhe krimet kundër njerëzimit.”

Ai theksoi se ministrja po legjitimon politikat për të cilat Slobodan Millosheviqi u akuzua në Tribunalin e Hagës.

“Në çdo demokraci të bazuar në sundimin e ligjit, deklarata të tilla do të ishin të papajtueshme me ushtrimin e një funksioni publik. Presidenti Aleksandar Vuçiq duhet t’i dënojë pa asnjë mëdyshje këto deklarata dhe të sigurojë shkarkimin e saj të menjëhershëm.”

Gozi shtoi se Serbia nuk mund të pretendojë seriozisht integrimin në Bashkimin Evropian ndërsa zyrtarët e saj ringjallin retorikën e epokës së Millosheviqit.

“Respektimi i vlerave evropiane fillon me refuzimin e gjuhës së spastrimit etnik – pa asnjë ekuivok apo justifikim.”

Shqipëria: Deklaratë tronditëse dhe fyese për viktimat

Ministri për Evropën dhe Punët e Jashtme i Shqipërisë, Ferit Hoxha, e cilësoi deklaratën e Paunoviqit si të papranueshme.

Sipas tij, shprehja e keqardhjes se në Kosovë nuk është kryer një spastrim etnik edhe më i madh relativizon dhe normalizon një nga krimet më të rënda kundër njerëzimit.

Ai theksoi se deklarata të tilla bien ndesh me vlerat evropiane, minojnë përpjekjet për pajtim, ushqejnë mosbesimin dhe urrejtjen, si dhe rihapin plagët e luftës, duke shtuar se askush nuk mund të ndërtojë besim duke lartësuar politikat dhe figurat përgjegjëse për krimet në rajon.

Serbia në mbrojtje të deklaratës skandaloze të Paunoviqit

Ndryshe nga reagimet ndërkombëtare, zëvendëskryeministri dhe ministri i Brendshëm i Serbisë, Ivica Daçiq, doli në mbrojtje të ministres, duke i cilësuar kritikat ndaj saj si “të turpshme dhe hipokrite”.

“Ata që e akuzojnë Snezhana Paunoviqin për nxitje të pretenduar të spastrimit etnik, prej vitesh heshtin për spastrimin etnik të serbëve nga Kosova.”

Ai pretendoi se në Kosovë është kryer spastrim etnik ndaj serbëve dhe se askush nuk reagon për këtë.

“Dhe tani Snezhana Paunoviq qenka fajtore për spastrim etnik? Turp t’ju vijë.”

Daçiq deklaroi gjithashtu se:

“E vetmja e vërtetë është se në Kosovë është kryer spastrim etnik ndaj serbëve nga vendbanimet e tyre shekullore.”

Deklaratat e tij u shoqëruan me pretendime të pambështetura me prova se qindra mijëra serbë janë dëbuar nga Kosova dhe me akuza ndaj autoriteteve kosovare.

Deklarata fillestare e Paunoviqit, e cila shprehu gatishmërinë për të kryer spastrim etnik në Kosovë po të kishte qenë në vend të Slobodan Millosheviqit gjatë vitit 1998, vazhdon të shkaktojë reagime të forta politike dhe diplomatike, ndërsa zyrtarë evropianë dhe rajonalë kërkojnë përgjegjësi dhe distancim të qartë nga retorika që justifikon krimet e luftës./lajmi.net/