Lionel Messi dhe Neymar kryesojnë në renditjen e golashënuesve më të mirë në Kampionatin botëror me nga katër gola në tri ndeshje.

Kapiteni i Argjentinës dhe sulmuesi i Brazilit kanë shkëlqyer deri më tani gjatë këtij Botërori, dhe janë duke zhvilluar një betejë në distancë për Këpucën e Artë të garës më të rëndësishme ndërkombëtare.

Mirëpo, nëse ata vazhdojnë me këtë ritëm të përbashkët të golave, atëherë mund të ndodh që fituesi të përcaktohet në finalen e madhe në Maracana, ku Brazili dhe Argjentina mund të ndeshen nëse kalojnë pengesat përkatëse deri në aktin përfundimtar të garës.

Messi dhe Neymar janë shokë nga Barcelona dhe të dy kanë pranuar se do të dëshironin që të takoheshin në finale të Botërorit. 

Lionel Messi i ka synimet e qarta. Ylli i Argjentinës dëshiron të luajë në finalen e Kampionatit botëror në Brazil.

Gjiganti nga Amerika e Jugut është një prej skuadrave që konsiderohet se ka gjasa të mira për të arritur deri në fazën përfundimtare të garës, dhe Messi ka shprehur ambiciet e tij.

“Është një ëndërr e madhe të luaj në finale dhe të fitoj Kampionatin botëror”, deklaroi Messi për DeporTV.

“Shpresoj të ballafaqohem me Neymarin në finale. Por, nëse nuk është kundër tij, atëherë le të jetë cilido ekip tjetër. Botërori ju motivon shumë, dhe unë jam i vendosur që të mos i përsëritim gabimet e së kaluarës. Nuk kam dyshime, me këtë grup që kemi mund të arrijmë sukses”, u shpreh ai.

“Në fushë nuk jam i njëjtë si në shtëpi. Më pëlqen të fitoj dhe nëse duhet të luftoj për ta bëjë, do ta bëjë”, përfundoi ai.