Menaxheri i Oleksandr Usyk, Egis Klimas, e ka thumbuar Tyson Furyn në deklaratën e tij të fundit për medie.

Në një prononcim për The Ring, ai tha se, ndryshe nga “Gypsy King”, Usyk i sfidon fituesit, jo humbësit.

Ukrainasi, pas triumfit të dytë, në po aq meçe, ndaj Anthony Joshuas, e ka rikonfirmuar pozitën e tij si kampion i peshave të rënda në boks.

Duke e parë formën e mirë të tij, kanë filluar përpjekjet për një kundërshtar tjetër, e njëri prej më të përfolurve është Deontay Wilder.

“Usyk dëshiron që të ndeshet me Wilder, por kushdo që e fiton meçin në mes të tij dhe Helenius, do të jetë në ring me ukrainasin. Ai s’është si Fury. Ai i sfidon fituesit, jo humbësit”, theksoi Klimas.

Siç dihet, javë më parë u përfol për një meç të mundshëm në mes të Furyt dhe Usyk, por që nuk u arrit dakordim i plotë.

Për rrjedhojë, Fury vendosi t’i japë shans bashkëkombësit të tij, Anthony Joshuas, për një duel në dhjetor. /Lajmi.net/