Kombëtarja shqiptare e futbollit po luan mbrëmjen e sotme përballë Ukrainës në stadiumin “Air Albania” ndeshjen e fundit në grupin B1 në Ligën e Kombeve.

Ndeshja ka nisur me një atmosferë elektrizuese të dhuruar nga tifozët në shkallët e stadiumit pas këndimit të himneve kombëtare.

Trajneri i Kombëtares Silvinjo ka vendosur që mbrëmjen e sotme të zbresë në fushë me Strakosha, Balliu, Ismajli, Ajeti, Mitaj, Ramadani, Asllani, Laçi, Asani, Muçi, Daku.

Ndërsa trajneri i Ukrainës, Serhiy Rebrov ka zbritur në fushën e lojës me formacionin Trubin; Mykolenko, Matviyenko, Zabarnyi, Konopia; Kaliuzhnyi; Mudryk, Sudakov, Zinchenko, Hutsuliak; Yaremchuk.

Sfida u zhbllokua që në minutën e 5-të, teksa miqtë kaluan në avantazh me anë të Zinchenko, i cili me një gjuajtje të bukur, e ndali topin në rrjetë.

Ukraina dyfishoi rezultatin shumë shpejt që në minutën e 9-të me Yaremchuk, i cili shfrytëzoi një top të ardhur nga e djathta.

Në minutën e 18-të mundësi e mirë për kuqezinjtë. Daku merr një top në mesfushë dhe pason për Muçin, por ky i fundit bllokohet nga Zinchenko në zonë.

Në të 25-ën Qazim Laçi i afrohet golit. Mesfushori provon me një gjuajtje të fortë në zonë, por topi gjen rrjetën e jashtme.

Një minutë më pas Strakosha i mohon golin e tretë Ukrainës. Portieri i Shqipërisë reagon mirë ndaj gjuajtjes së Sudakov.

Në minutën e fundit të pjesës së parë erdhi rasti më i mirë për Shqipërinë. Muçi shmangu në hyrje të zonës mbrojtësin ukrainas, por goditi jashtë.

Me rezultatin 0-2 u mbyll pjesa e parë e ndeshjes.

Pjesa e dytë nisi me dy zëvendësime te Shqipëria. Uzuni dhe Bajrami në fushë, marrin vendin e Dakut dhe Asanit.

Uzuni u shfaq menjëherë rrezikshëm por topi që kishte kaluar portierin largohet nga njëri prej mbrojtësve.

Në të 50-ën Ernest Muçi i pafat u dëmtua dhe la fushën e lojës, Arbër Hoxha u aktivizua në vendin e tij.

Dy minuta më pas provoi Nedim Bajrami me një gjuajtje të fortë nga distanca, por topi preku rrjetën e sipërme.

Në minutën e 62-të Arlind Ajeti provon supergolin nga jashtë zone. Gjuajtja e fortë e mbrojtësit, ndalet me vështirësi nga portieri Trubin.

Në minutën e 75-të Shqipëria shënoi me Bajramin nga penalltia, e cila u fitua nga Uzuni.

Rezultati i sfidës së sotme do të vendosë fatin e Kombëtares, të cilës i duhet fitorja dhe një barazim mes Çekisë dhe Gjeorgjisë për të marrë kreun e grupit.

Vendi i parë në grup do ta ngjiste Kombëtaren në Ligën A dhe do të mbante gjallë shpresat që të jetë pjesë e play off të Botërorit 2026 në bazë të renditjes së përgjithshme.

Nëse Kombëtarja zë vendin e dytë do të ishte pjesë e play off për ngjitje në Ligën A. Në anën tjetër humbja me Ukrainën do të zbriste Shqipërinë në Ligën C. Në këtë grup të vështirë çdo skenar është i mundshëm./