Pas nëntë javësh grevë, Kuvendi i Kosovës ka arritur më në fund të zgjidhë problemin e krijuar për shkak të kërkesave për ngritjen e pagës minimale për punëtorët e mirëmbajtjes higjienike, pasi sot ka arritur kontratë të re me të njëjtin operator ekonomik dhe paga mujore do të jetë së paku 400 euro.

Punëtorët e mirëmbajtjes në Kuvendin e Kosovës janë në grevë qe 9 javë, me kërkesa për ngritjen e pagës. Kuvendi në një sqarim ka bërë punëtorët e mirëmbajtjes janë të angazhuar nga ana e operatorit ekonomik, me të cilin Kuvendi ka kontratë për pastrim dhe mirëmbajtje higjienike.

Kuvendi thotë se kontrata e fundit për pastrim dhe mirëmbajtje higjienike është arritur para se Qeveria të vendosë rritjen e pagës minimale në 350 euro.

Kontrata e mirëmbajtjes/pastrimit ka përfunduar më 14.11.2024, ndërkaq Kuvendi, pasi ka zhvilluar procedurën e prokurimit dhe bazuar në oferta, sot, ka lidhur kontratë të re për pastrim dhe mirëmbajtje higjienike, me operatorin Schafberger Jr. GmbH – Dega Kosovë.

Në respektim të vendimit të Qeverisë për pagën minimale, në kontratën e lidhur sot pagesa mujore për punëtorët e mirëmbajtjes/pastrimit do të jetë së paku 400 euro.

Kuvendi sqaron gjithashtu se sipas ligjit nuk ka të drejtë të ndërhyjë në përzgjedhjen e stafit të operatorit ekonomik.

Si informatë shtesë, pagat minimale bruto për stafin e kontraktuar për pastrim dhe mirëmbajtje higjienike, nga viti 2018, kanë qenë si në vijim: kontrata 21.12.2018 – 20.12.2021 – paga minimale bruto 250 euro, kontrata 21.12.2021 – 20.03.2022 – paga minimale bruto 250 euro, kontrata 01.04.2022 – 30.04.2022 – paga minimale bruto 250 euro, kontrata 01.05.2022 – 31.10.2022 – paga minimale bruto 280 euro, kontrata 01.11.2022 – 30.04.2023 – paga minimale bruto 280 euro, kontrata 01.05.2023 – 30.04.2024 – paga minimale bruto 300 euro, kontrata 15.05.2024 – 14.11.2024 – paga minimale bruto 300 euro.