Kryeministri në detyrë i Kosovës, Albin Kurti, ka reaguar për herë të parë pas polemikave që kanë shpërthyer në opinion publik rreth kryetarit të sapozgjedhur të Kuvendit, Dimal Basha, dhe një punimi shkencor të vitit 2012, ku Basha figuron si bashkëautor.

Në atë publikim, ku trajtohen lidhjet ndërmjet krimit të organizuar dhe luftërave në Ballkan, një nga kapitujt përmend Ushtrinë Çlirimtare të Kosovës si të financuar nga trafiku i drogës – gjë që ka shkaktuar reagime të forta, sidomos nga OVL-UÇK, transmeton lajmi.net.

Por Kurti është rreshtuar në mbrojtje të Bashës, duke e minimizuar rëndësinë e publikimit dhe duke e zhvendosur fajësinë tek vendimmarrjet politike të së kaluarës.

“Dimal Basha e ka dhënë sqarimin për atë publikim që është bërë para më shumë se një dekade. Ai ka thënë se kapitulli që e ka shkruar nuk ka të bëjë me UÇK-në. Edhe në fjalimin e tij pas zgjedhjes si kryetar Kuvendi, ai shprehu vlerësimet më të larta për këtë vlerë të kombit shqiptar”, tha Kurti.

Në vazhdim, ai shtoi:

“Problemet i kemi kur është nënshkruar ‘Zajednica’, kur janë amnistuar kriminelët serbë në veri, kur është votuar Gjykata Speciale, kur është themeluar Lista Serbe. Problemet i kemi kur politikanët e Kosovës kanë bërë qeveri duke u varur nga Lista Serbe, apo kur kanë hyrë në pazare për ndarje të Kosovës, jo te ky artikull ku manipulohet një kapitull për të cilin ky s’ka faj.”

Punimi shkencor ku figuron emri i Bashës është bashkautorësi me akademiken maqedonase Jana Arsovska. Pjesa më problematike është një kapitull i shkruar nga Arsovska, ku thuhet se UÇK-ja ka pasur financim nga rrjete të trafikut të drogës. Kjo ka ngjallur kërkesa për shkarkimin e Bashës, përfshirë nga organizatat e dala nga lufta./lajmi.net/