Pas disa ditësh sfiduese për shkak të problemeve teknike në kanalin Ibër-Lepenc, Kompania Rajonale e Ujësjellësit Prishtina ka njoftuar se fabrika në Shkabaj ka rifilluar trajtimin e ujit, pasi turbullira është larguar gradualisht nga kanali.

Sipas KRU “Prishtina”, aktualisht, furnizimi është rikthyer në kapacitet maksimal nga të tri impiantet: Albanik, Badoc dhe tashmë edhe Shkabaj.

Megjithatë, për shkak të kërkesës së lartë për ujë, disa zona të kryeqytetit – përfshirë Mati 1, rrugën “Ndue Përleshi”, rr. “Sokol Sopi”, lagjen City Home, rr. “Bahri Ademi” dhe pjesë të tjera përreth – po përballen ende me mungesë të stabilitetit në furnizim.