Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve (QNR) po vazhdon numërimi i fletëvotimeve nga votimi me kusht në kuadër të zgjedhjeve të parakohshme për Kuvendin e Kosovës, të mbajtura më 28 dhjetor 2025.

Sipas njoftimit të KQZ-së, deri të martën, më 6 janar 2026, në orën 16:00, në QNR janë numëruar fletëvotimet nga 49 prej 57 vendvotimeve ku është zhvilluar votimi me kusht, transmeton lajmi.net.

KQZ ka bërë të ditur se procesi i numërimit të fletëvotimeve nga votimi me kusht, si dhe atyre nga votimi i personave me nevoja të veçanta, pritet të përmbyllet gjatë ditës së sotme.

Sipas të dhënave zyrtare, nga 57 vendvotime me kusht të shpërndara në 38 komuna të vendit, në sistem janë evidentuar mbi 9 mijë e 900 votues të regjistruar për të votuar me kusht, ndërsa numri i votuesve të regjistruar në programin e votimit për personat me nevoja të veçanta ka qenë 2 mijë e 860.

Ndërkohë, KQZ njofton se në platformën e saj për publikimin e rezultateve kanë filluar të shfaqen edhe mandatet e fituara nga subjektet politike, në përputhje me dinamikën e numërimit të fletëvotimeve.

Njoftimi i plotë: