Komisioni Qendror i Zgjedhjeve (KQZ) ka bërë të ditur se procesi i rinumërimit të fletëvotimeve në Qendrën e Numërimit dhe Rezultateve po vazhdon, ndërsa deri më tani janë rinumëruar 1,500 vendvotime nga gjithsej 2,557 sa janë përfshirë në këtë proces.

Sipas KQZ-së, me përfundimin e rinumërimit të këtyre vendvotimeve, është mbyllur procesi i verifikimit në 22 komuna të vendit, transmeton lajmi.net.

“Numërimi i fletëvotimeve është duke u zhvilluar sipas listës së vendvotimeve për të cilat Komisioni Qendror i Zgjedhjeve ka marrë vendim për rinumërim. Nga fillimi i këtij procesi më 13 janar 2026, në orën 18:00, e deri më 24 janar 2026, në orën 16:00, janë rinumëruar mbi 58 për qind e vendvotimeve”, thuhet në njoftimin e KQZ-së.

Procesi i rinumërimit ka nisur pas evidentimit të parregullsive gjatë fazës fillestare të numërimit, ndërsa KQZ ka theksuar se puna do të vazhdojë deri në përmbylljen e plotë të të gjitha vendvotimeve të përfshira në vendim.