Operatori i Sistemit, Transmisionit dhe Tregut – KOSTT ka njoftuar se Sistemi Elektro-Energjetik i Kosovës po përballet me rritje të ndjeshme të konsumit gjatë sezonit dimëror, veçanërisht në orët e pikut.

Sipas KOSTT-it, konsumi është rritur për 14.33% krahasuar me vitin e kaluar, ndërsa ngarkesa maksimale ka arritur në 1468 MW, edhe pse temperaturat nuk kanë qenë shumë të ulëta.

“Kjo tregon se në ditët më të ftohta, konsumi mund të rritet edhe më tej”, thuhet në njoftim.

KOSTT thekson se operimi i sistemit në kushte mbingarkese mund të imponojë reduktime të kontrolluara dhe të përkohshme të furnizimit me energji elektrike, si masë teknike për mbrojtjen e stabilitetit të sistemit.

“Reduktimet janë të domosdoshme për të mbrojtur asetet kritike dhe për të garantuar furnizim të qëndrueshëm në afat më të gjatë”, thekson operatori, duke shtuar se zonat më të ngarkuara aktualisht janë Rahoveci (me Malishevën), Prizreni 1, Gjilani 1 dhe Lipjani.

Në këtë kontekst, KOSTT u bën thirrje qytetarëve, institucioneve dhe bizneseve që të bashkëpunojnë duke ulur konsumin, veçanërisht në intervalet 16:00–20:00 dhe 22:00–23:00.

“Përdorimi i kujdesshëm i energjisë dhe zhvendosja e konsumit jashtë orëve të pikut ndihmon drejtpërdrejt në shmangien e reduktimeve dhe në ruajtjen e stabilitetit të sistemit”, përfundon njoftimi.

Njoftimi i plotë:

𝐈𝐧𝐟𝐨𝐫𝐦𝐢𝐦 𝐦𝐛𝐢 𝐠𝐣𝐞𝐧𝐝𝐣𝐞𝐧 𝐚𝐤𝐭𝐮𝐚𝐥𝐞 𝐭ë 𝐬𝐢𝐬𝐭𝐞𝐦𝐢𝐭 𝐞𝐥𝐞𝐤𝐭𝐫𝐨-𝐞𝐧𝐞𝐫𝐠𝐣𝐞𝐭𝐢𝐤

Diagrami i konsumit dhe siguria e Sistemit (një ditë para 17.12.2025) ./lajmi.net/