Kërkohen verifikime shtesë për vazhdimin e shtesave për fëmijë, MF-ja pa sqarime

Lajme

15/09/2024 20:30

Një njoftim ka arritur në adresat elektronike të disa prindërve mbi nevojën për verifikime shtesë për fëmijët e tyre, ashtu që shtesat nga ana e qeverisë të vazhdojnë për ta.

Prindërit ankohen se nuk kanë informata sa duhet rreth procesit dhe theksojnë se kjo po u shkakton edhe telashe. Nga QPS në Prishtinë nuk kanë dashur të deklarohen rreth procesit e as nga Ministria e Financave nuk janë përgjigjur lidhur me çështjen.

Shtesat që ekzekutivi ka dhënë për fëmijët janë mirëpritur nga prindërit që nga kumtimi i lajmit.

Por, që ku ato u rriten muajin e kaluar, prindërit kanë filluar të pranojnë njoftime në llogaritë e tyre në e-Kosova se për vazhdimin duhen verifikime shtesë.

Kjo zonjë është njëra nga prindërit e shumtë që ka vizituar Njësinë 1 të Qendrës për Punë Sociale në Prishtinë, me disa dokumente të kërkuara për vazhdimin e shtesave.

Vërtetimi se janë nxënës, kopja e letërnjoftimit, kopja e faturës energjike janë vetëm disa nga dokumentet e kërkuara për atë që janë cilësuar si “verifikime shtesë”.

Por personi në fjalë thotë se për procesin ka mungesë informimi e njëheri, edhe telashe.

Njoftimin e kam marrë te shkolla, më treguan prindërit. Më thane këto dokumente duhet t’i kem dhe t’i sjell këtu, tek “Qafa”. Më thanë që nëse nuk i dorëzoj, më ndalen shtesat e fëmijëve, me fjalë të prindërve, s’di diç tjetër. Sot më erdh edhe mesazhi në e-mail. S’kam diçka tjetër. Punë na nxorrën, prita te drejtoresha më shumë se një orë tek drejtoresha për vërtetimin, mandej edhe faturë të rrymës u desht të merrja, letërnjoftimin fotokopje. Tash po më thonë se duhem të shkoj në Breg të Diellit…

Njësoj u shprehen prapa kamerave edhe prindër të tjerë të cilët thonë se nuk patën informata të mjaftueshme për procesin.

Të tjerë thonë se kjo u bë si shkak i ndërrimit të vendbanimeve e megjithatë, informata mbi këtë nuk kanë dhënë nga Qendra për Punë Sociale.

Nga QPS në Prishtinë nuk kanë dashur të deklarohen rreth procesit, gjersa kanë theksuar se luajnë rolin ndërmjetësues ndërmjet Ministrisë së Financave dhe qytetarëve. Ndërkaq, ata shprehen se interesimi gjatë këtyre ditëve, ka qenë i lartë.

Televizioni ka pyetur Ministrinë e Punës dhe Mirëqenies Sociale por e njëjta, ka thënë se përgjigjet duhet t’i jap Ministria e Financave.

Kjo e fundit, siç ndodh rëndom nuk i është përgjigjur interesimit të Dukagjinit për qëllimin e këtij njoftimi dhe nevojën e riverifikimit të prindërve që tashmë marrin shtesat për fëmijë. TV Dukagjini