Mënyra se si janë ndarë dhe si janë mbajtur kujdestaritë në Qendrën Klinike Universitare të Kosovës (QKUK) dhe në spitale rajonale e ka shtyrë Ministrinë e Shëndetësisë që të formojë një komision, i cili do t’i hetojë rastin.

“Koha Ditore” ka mësuar se dyshimet e para flasin për menaxherë (drejtorë klinikash) që e kanë futur veten në listat e kujdestarive, numër të madh të mjekëve kujdestarë nëpër klinika me kapacitete të vogla të kujdestarive, shumë mjekë kujdestarë të cilët janë paguar e pak të tillë që kanë kujdestaruar.

Sipas burimeve të gazetës, ka mjek që në QKUK i ka dalë paga mbi 2 mijë euro falë numrit të madh të kujdestarive që ka mbajtur.

Nisjen e procesit të verifikimit të listave të mjekëve kujdestarë e ka konfirmuar edhe ministri i Shëndetësisë, Imet Rrahmani.

Nuk dihet saktë se sa është dëmtuar buxheti i shtetit nga dallaveret me kujdestari, por financat janë arsyeja që MSh-ja ka nisur këtë hetim. Rrahmani thotë se këtë e kanë bërë pasi që muajin janar nuk kanë pasur fonde të mjaftueshme që të paguajnë numrin e kujdestarive.