Policia e Kantonit të Zug-ut, me rastin e një kontrollimi të bërë në një impiant ndërtimi në Neuheim, ka zënë një kosovar 22-vjeçar duke punuar ilegalisht. Pasi ka parë policinë, ai është përpjekur të ikë, por policët e kanë kapur pas disa metrash. Me këtë rast është konstatuar se ai është me qëndrim ilegal në Zvicër dhe nuk ka leje pune, transmeton albinfo.ch.

Prokuroria shtetërore e kantonit e ka dënuar punëtorin ilegal kosovar me burg efektiv prej 40 ditësh. Ndërkohë, Zyra për Migracion ka vendosur dëbimin e tij nga Zvicra dhe ndalimin e hyrjes në Zvicër pas dëbimit.

Vetëm pak ditë më parë, të hënën, policia e Zug-ut ka zënë edhe një punëtor tjetër në “të zezë”. Bëhet fjalë për një të ri 23-vjeçar, po ashtu nga Kosova. Ai është zënë me rastin e një kontrollimi të automjeteve. Kur i kanë kërkuar dokumentin, ai ka ofruar një leje njoftimi dhe një patentë shoferi nga Bullgaria, shkruan infoticker.ch.

Pas kontrollimit me metoda kriminalo-teknike është konstatuar se të dy dokumente janë të falsifikuara. Ai ka pranuar se është nga Kosova dhe se punon pa leje si ndihmës transporti.

Prokuroria e shtetit e ka dënuar kosovarin me kusht prej 80 njësish ditore dhe me një gjobë. Ndërkohë, Zyra për Migracion e ka dëbuar atë të enjten për në Kosovë. Po kështu, i është ndaluar hyrja në Zvicër për tre vjet.