Kalkulimi i Haradinajt me seancën për Dialogun
Kryeministri Ramush Haradinaj ka kërkuar nga Kryesia e Kuvendit të Kosovës që të ftojë seancë të jashtëzakonshme për miratimin e Ligjit dhe Platformës së Dialogut, për nesër në orën 09:00, dhe për këtë ka pasur një kalkulim.
Lajme
Burime të Lajmi.net thonë se Haradinaj është në panik nga acarimi i partnerëve të koalicionit, PDK-së dhe Nismës, si dhe Shteteve të Bashkuara të Amerikës, me sjelljet e tij për përfitime personale politike nga taksa dhe bllokimi i Dialogut.
Haradinaj ka mbajtur taksën që nga 21 nëntori i vitit të kaluar, duke acaruar kështu skajshmërisht raportet me SHBA-në, ndërsa tani mësohet se shumë shpejt do ta heqë atë.
Kalkulimi i tij, siç thuhet, është i thjeshtë: të përfitojë nga elektorati me idenë se ishte i vetmuar në mbrojtjen e taksës dhe në të njëjtën kohë ta demonstrojë fuqinë e tij para ndërkombëtarëve se ai është zgjidhja e vetme në Kosovë.
Për këtë arsye, siç pohohet, kryeministri ka ftuar seancën e jashtëzakonshme, vetëm dy ditë para se në Kosovë të vijë për vizitë David Hale, Zëvendëssekretar i Departamentit Amerikan të Shtetit për Çështje Politike.
Hale do ta vizitojë Kosovën të shtunën me një mision të qartë: zhbllokimin e kësaj situate të ngrirë që po ndërlikon jo vetëm Dialogun, por po rrezikon edhe raportet SHBA-Kosovë dhe interesat e të dyja vendeve.
Emergjenca e kërkimit të seancës së jashtëzakonshme, për LDK-në dhe Vetëvendosjen, është kundër çdo precedenti të deritashëm parlamentar, por duket edhe mundësi e Haradinajt për ta hequr taksën.
Po ashtu, burime nga Kabineti i Haradinajt theksojnë së shpejti do të ketë vendimmarrje për këtë çështje nga kryeministri, pasi të votohet Platforma për Dialogun. /Lajmi.net/