Ylli i ri i Manchester Unitedit, Adnan Januzaj kërkohet nga shumë klube të mëdha evropiane pasi ka hyrë në muajt e fundit të kontratës së tij në Old Trafford që është e paraparë të skadojë në fund të këtij sezoni.

Dy gola në debutimin e tij si titullar në Premierligë ia sollën Unitedit fitoren e mundimshme por shumë të rëndësishme ndaj Sunderlandit me rezultat 2-1 dhe Januzajt një vëmendje të gjerë që përveç kualiteteve të tij e ka vënë në qendër të diskutimit edhe sa i përket përfshirjes në Kombëtaren e Anglisë.

Roy Hodgson konfirmoi se e përcjell atë por Januzaj ende nuk ka vendosur se ku qëndron e ardhmja e tij ndërkombëtare.

Kurse, sa i përket klubeve të interesuara për shërbimet e tij – përveç Manchester Unitedit që i ka ofruar 60 mijë funte në javë sipas kontratës së re – janë Barcelona, Juventus, Bayern Munich dhe Manchester City.

Mirëpo, sipas Bleacher Report, Januzaj dhe karakteristikat e tij janë më të përshtatshme për gjigantin katalan. “Januzaj ka një stil të lojës që i përshtatet në mënyrë perfekte Barcelonës”, shkruan Bleacher Report.