Pasi që fitoi zgjedhjet në nëntor të vitit të kaluar, Donald Trump të hënën pritet të rikthehet në Shtëpinë e Bardhë, ku zyrtarisht do të bëhet presidenti i 47-të i Shteteve të Bashkuara të Amerikës.

Si çdo herë, edhe kësaj radhe, dita e inaugurimit përfshin një ceremoni formale betimi, përformanca muzikore, një paradë festive dhe një numër ballosh formale.

Gjatë ditës së premte, u njoftua se inaugurimi i Trumpit, do të zhvendoset në ambiente të mbyllura, për shkak të temperaturave të ftohta të parashikuara në kryeqytetin amerikan.

Kush nga Kosova do të merr pjesë në këtë inaugurim?

Liderë e emra të njohur të politikës dhe ekonomisë nga Kosova, do të jetë të pranishëm në inaugurimin e presidentit, Donald Trump, të hënën më 20 janar në Uashington DC në Shtetet e Bashkuara të Amerikës.

Presidentja e Kosovës, Vjosa Osmani ka marrë ftesë nga anëtarë të Kongresit të Shteteve të Bashkuara për të marrë pjesë në inaugurimin e Presidentit të ri amerikan.

Bekim Kupina nga kabineti i Osmanit, ka thënë për Nacionalen se Presidentja ka vendosur ta dërgojë një delegacion të kabinetit të saj, kështu duke mos marrë pjesë vet.

“Presidentja e Republikës së Kosovës, Vjosa Osmani ka marrë ftesë nga anëtarë të Kongresit të Shteteve të Bashkuara (Senati dhe Dhoma e Përfaqësuesve), për të marrë pjesë në inaugurimin e Presidentit të ri amerikan, Donald Trump. Megjithatë, duke u bazuar në traditën protokollare, shumica e vendeve përfaqësohen në këto ceremoni nga ambasadorët e tyre të akredituar në Ëashington D.C. Duke e vlerësuar këtë ngjarje si një moment të rëndësishëm në marrëdhëniet në mes Kosovës dhe SHBA-ve, Presidentja ka vendosur ta dërgojë një delegacion të kabinetit të saj, i cili, së bashku me ambasadorin në SHBA, Ilir Dugolli, do ta përfaqësojnë Kosovën në aktivitetet inauguruese të datave 19-21 janar.” – ka thënë ai.

Ajo se çfarë dihet tashmë, i pranishëm në këtë ceremoni do të jetë kreu i AKR-së, Behgjet Pacolli.

Këshilltari i Pacollit, Jetlir Zyberaj, më 15 janar njoftoi se me ftesë të veçantë të Presidentit Donald Trump, Pacolli do të marrë pjesë në ceremoninë e inaugurimit.

Ai tutje ka shkruar se për Pacolli, marrëdhënia midis Kosovës dhe Shteteve të Bashkuara të Amerikës ka qenë gjithmonë me rëndësi të veçantë, dhe lidhja e tij shumëvjeçare me Presidentin Trump pasqyron këtë përkushtim.

“Presidenti Pacolli është i bindur se nën udhëheqjen e Presidentit Trump, Kosova do të vazhdojë të forcojë pozicionin e saj global, të tejkalojë izolimin ndërkombëtar aktual dhe të arrijë përparime të rëndësishme në rrugëtimin e saj drejt integrimit të plotë.” – ka shkruar Zyberaj.

Edhe kreu i Aleancës për Ardhmërinë e Kosovës, Ramush Haradinaj do të marrë pjesë në ceremoninë e inaugurimit të Trumpit.

Haradinaj ka udhëtuar për në ShBA gjatë ditës së premte, ku për këtë ka njoftuar kandidati i AAK-së për deputet, Haki Abazi.

“Sot jemi nisur për vizitë në Uashington D.C, për me i vazhdu punët e mira dhe punët e mbara! Rrugës për në festën e madhe të inaugurimit të Presidentit të SHBA, Donald Trump.” – ka shkruar Abazi, ku ka postuar një fotografi së bashku me Haradinajn.

Nga Partia Demokratike të Kosovës, Hisen Berisha, ditë më parë ka njoftuar se do të jetë i pranishëm në këtë ceremoni.

“Deputeti Hisen Berisha ftohet në inaugurimin e Donald J. Trump si presidenti i 47-të i Shteteve të Bashkuara dhe JD Vance si nënkryetari i 50-të i Shteteve të Bashkuara në Uashington, D.C., të hënën, më 20 janar 2025.” – është thënë në njoftimin e faqes zyrtare të Berishës në “Facebook”.

Deputetja e Lidhjes Demokratike të Kosovës, Rrezarta Krasniqi, është gjithashtu personalitet nga Kosova që do të merr pjesë në inaugurimin e Trumpit.

“Është një nder i jashtëzakonshëm dhe privilegj i madh për mua të jem e ftuar në ceremoninë e inaugurimit të presidentit të Shteteve të Bashkuara të Amerikës, Donald Trump.” – ka shkruar ajo, duke vazhduar se ShBA-ja ka qenë dhe mbetet aleati ynë më i madh, një partner i pazëvendësueshëm që ka qëndruar krah nesh në rrugëtimin drejt lirisë, pavarësisë dhe konsolidimit të shtetit tonë.

Drejt Uashington DC për inaugurimin e Trumpit ka udhëtuar edhe biznesmeni i njohur kosovar, Shkëlqim Devolli.

Klan Kosova, dy ditë më parë ka raportuar se “aksionari i “Devolli Corporation” ka marrë ftesë nga ekipi organizues i ceremonisë që mbahet në Uashington DC, ku Presidenti i 47 i SHBA-së do të japë betimin solemn, para se të marrë detyrën në Shtëpinë e Bardhë”.