Falënderoj nga zemra secilin qytetar që ka zgjedhur Lidhjen Demokratike të Kosovës. Falënderoj mijëra aktivistë të Lidhjes Demokratike të Kosovës në degë e nëndegë, në çdo lagje e fshat anembanë Kosovës, të cilët kanë kaluar ditë të tëra duke trokitur në çdo derë dhe duke organizuar tubime elektorale për të kërkuar besimin e qytetarëve për Lidhjen Demokratike të Kosovës. Këta aktivistë përbëjnë shtyllat mbi të cilat mbahet Lidhja Demokratike e Kosovës.

Falënderoj të 49,957 votuesit e Lidhjes Demokratike të Kosovës, të cilët, brenda një liste shumë cilësore të grave dhe burrave të Lidhjes Demokratike të Kosovës, ma kanë dhënë besimin mua që t’i përfaqësoj në Kuvendin e Republikës së Kosovës.

Ky besim për mua është konfirmim dhe mbështetje e qëndrimeve që kam mbajtur në vazhdimësi, qëndrime që kanë për qëllim vetëm mbrojtjen dhe promovimin e vlerave politike konservatore, demokratike dhe euro-atlantike që Lidhja Demokratike e Kosovës përfaqëson në shoqërinë tonë. Këto janë vlerat, mbi të cilat kolosët politikë shqiptarë të kohës moderne, të prirë nga Presidenti Rugova, e themeluan Lidhjen Demokratike të Kosovës.

Ky besim për mua është mesazh për t’i mbrojtur këto vlera me përgjegjësinë më të lartë, vlera që për mua janë udhërrëfyes për veprimet e mia të përditshme politike dhe jetësore: besimi në Zot dhe në familjet tona, pacenueshmëria e demokracisë dhe e lirive individuale e kolektive, liberalizmi ekonomik krahas kujdesit ndaj grupeve shoqërore në nevojë, integrimet shqiptare dhe fuqizimi i aleancave euro-atlantike të Republikës së Kosovës.

Mesazhi që votuesit në këto zgjedhje na kanë dhënë është shumë i qartë për secilin nga ne.

Unë besoj në potencialin politik të Lidhjes Demokratike të Kosovës dhe angazhohem me mish e me shpirt që i gjithë ai potencial të aktivizohet në interes të Republikës së Kosovës.

Unë besoj shumë fuqishëm se vlerat e Lidhjes Demokratike të Kosovës në asnjë rrethanë nuk maten me rezultate zgjedhore.

I juaji,

Avdullah Hoti