Për herë të parë në historinë e sportit të Republikës së Kosovës, një sportist vendës ka hyrë zyrtarisht në librin e rekordeve botërore dhe evropiane.

Bëhet fjalë për pilotin dhe instruktorin Fanol Shala, i cili ka marrë Diplomën e Rekordit Botëror dhe Europian, duke ngritur flamurin e Kosovës në nivelin më të lartë të sportit aeronautik ndërkombëtar, transmeton lajmi.net.

Sipas Federatës Aeronautike të Kosovës, ky sukses i Shalës është një arritje historike që “ka peshë të barasvlefshme me çdo medalje olimpike” dhe dëshmon se përkushtimi, guximi dhe talenti kosovar nuk njohin kufij. Shala tashmë konsiderohet një simbol i sportit ajror dhe krenari për mbarë vendin.

Ky rekord nuk do të ishte i mundur pa mbështetjen e Ministrisë së Kulturës, Rinisë dhe Sportit, Komunës së Obiliqit, si dhe Komitetit Olimpik të Kosovës, të cilët u vlerësuan për përkrahjen e vazhdueshme ndaj sportistëve elitarë të vendit.

Njoftimi i plotë i Federatës së Aeronautikës së Kosovës:

Historike për sportin e Kosovës

Për herë të parë në historinë e Republikës së Kosovës, një sportist ynë ka arritur rekorde botërore dhe europiane të ratifikuara zyrtarisht!

Ky sukses historik nuk do të ishte i mundur pa përkrahjen e institucioneve tona të dashura dhe përkrahja e familjes:

Ministria e Sportit e Kosovës – për mbështetjen e palodhur

Komuna e Obiliqit – për besimin dhe motivimin e vazhdueshëm Komiteti Olimpik i Kosovës – për inkurajimin dhe nxitjen e sportistëve tanë drejt sukseseve ndërkombëtare