Numri i personave të angazhuar me kontrata për shërbime të veçanta në komunat e Kosovës ka shënuar rritje të konsiderueshme gjatë vitit 2025, krahasuar me vitin paraprak, ka bërë të ditur Instituti GAP.

Sipas të dhënave të publikuara nga GAP, gjatë vitit 2025 në komunat e vendit janë regjistruar gjithsej 534 kontrata për shërbime të veçanta, krahasuar me 381 sa ishin në vitin 2024. Kjo paraqet një rritje prej rreth 40 për qind të numrit të angazhimeve përmes këtyre marrëveshjeve.

Instituti sqaron se emërimet me afat të caktuar për periudha më të shkurtra se gjashtë muaj realizohen përmes “Marrëveshjeve për shërbime të veçanta”, të cilat bazohen në Ligjin për marrëdhëniet e detyrimeve dhe zhvillohen përmes një procedure më të thjeshtuar rekrutimi.

Sipas analizës së GAP-it, rritjen më të madhe e ka shënuar Komuna e Prishtinë. Numri i të angazhuarve me këto kontrata është rritur nga 73 në vitin 2024 në 207 gjatë vitit 2025, duke regjistruar 134 angazhime më shumë brenda një viti.

Rritje të konsiderueshme kanë shënuar edhe Zveçan, ku numri i kontratave ka kaluar nga zero në 22, Obiliq nga 16 në 31, si dhe Pejë nga shtatë në 20 kontrata.

Në anën tjetër, disa komuna kanë regjistruar ulje të numrit të angazhimeve me kontrata për shërbime të veçanta. Sipas të dhënave, në Gjilan numri ka rënë nga 97 në 65, në Malishevë nga 22 në 10, ndërsa në Viti nga 20 në nëntë kontrata.

Instituti GAP nuk ka ofruar vlerësime lidhur me arsyet e këtyre ndryshimeve, por raporti evidenton një trend të qartë të rritjes së angazhimeve përmes marrëveshjeve për shërbime të veçanta në nivel lokal gjatë vitit 2025. /Lajmi.net/