Një rast i ngjashëm me një tjetër që kishte tronditur Amerikën, por edhe gjithë botën vite më parë ndodhi së fundi në Kosovë.

“Vrasje nga pakujdesia” po cilësohet fillimisht rasti i Agon Zejnullahu, 27 vjeçarit që vdiq në rrugë derisa për arrestimin e tij po “përkujdeseshin” pesë zyrtarë policorë.

Agon Zejnullahu raportohet të ketë ndërruar jetë në rrugë, derisa si fillim policia kishte njoftuar se po ndërhynin në arrestimin e tij për shkak se ai ishte në gjendje të dehur dhe po sulmonte qytetarët e makinat në lëvizje.

Por rasti në fjalë nuk u raportua në Inspektorat Policor as për tetë orë- gjë që vuri edhe më tepër dyshime në rast.

Tanimë që rasti po trajtohet nga Prokurori i Krimeve të Rënda dhe pesë zyrtarët policorë janë në ndalim- një rast tjetër është kthyer në mendje.

Është ai i George Floyd në Amerikë.

Floyd ishte vrarë më 25 maj 2020 nga një zyrtarë policorë në Minneapolis Minesota gjatë një arrestimi.

Arrestimi i burrit afrikano-amerikan ishte bërë kishte për një kartëmonedhë të falsifikuar njëzet dollarëshe.

E këtë rast me 27 vjeçarin në Lipjan e lidhi edhe avokati, Arianit Koci.

Ai madje çuditet me mos-reagimin e qytetarëve, derisa për këtë rast në Amerikë ishte protestuar vazhdimisht.

Postimi:

Vdes George Floyd – në duart e policisë – krejt Amerika çohet n’këmbë. Protesta, rrëmujë, presion. Shteti dridhet.

Te na, vdes një djalë 27-vjeçar – në duart e policisë. Reagimi? Disa statuse prej shtëpisë.

Në anë tjetër, Kuvendi – dështon me u formu për herë të 43-të. Shteti – në bllokadë. Populli – në gjumë.

E vërteta është e thjeshtë: një popull si ky i yni, nuk e kundërshton autoritetin – edhe kur ai është i padrejtë, ose i rrezikshëm.

Prandaj, nuk po e kuptoj, pse hala po çuditemi që jemi shteti ma i varfër, e ma i paorganizum n’Evropë?!

Tani, a po e kuptoni pse pushtuesit na kanë mbajtë me shekuj nën këmbë?

Se shumë shpesh, s’kemi pasë guxim me u çu, me protestu – as kur duhet, as për atë që duhet./Lajmi.net/