Djali i saj, Avdullah Rukolli, asokohe rreth 25 vjeçar, u vra ditën e 5 prillit në Rezallë të Skenderajt. Pastaj, paramilitarët serb e zhdukën trupin e tij, bashkë me shumë të tjerë.

Eshtrat e tij u gjendën vitin e kaluar në Rudnicë të Rashkës. E sot, bashkë me 27 trupa të tjerë ai u rivarrosë në fshatin Rezallë.

Nëna e tij, me lot në sy po e kujton rininë e djalit që nuk e gëzoi siç duhet.

“Mu ka lehtësuar qysh jo, pasi që është gjetur veç janë mbytë boll valla, dy vëllezër, djalin e vëllait, djali im. Sot e kanë gjet djalin tim”, thotë ajo.

Ai u vra në moshë të re. Pas vetës nuk la asnjë fëmijë.

“Djali jem, i ri ka shku, nuk ka lënë fëmijë as asgjë”, thotë ajo.

E Nazif Deliu sot po e varrosë babën dhe axhën. Ai thotë se po ndihet më mirë tash që të paktën po ia din varrin.

“Deri sot kemi qenë shumë por sot po e ndjej vetëm pak ma mirë, pasi që po i varrosi se deri me sot jemi kanë shumë në ngarkesë….deri më sot kemi qenë të ngarkuar psiqikisht, sot po e ndjej vetën pak më të lirë pak ma mirë”, thotë ai.

Ditën e 5 prillit të vitit ‘99 forcat paramilitare serbe mblodhën burra, gra, pleqtë e fëmijë nëpër fshatin Rezallë për t’i vendosur pastaj në shtëpinë e Hashim Dërgutit.

Që nga orët e para të mëngjesit aty, në oborrin e asaj shtëpie, i maltretuan me fjalë e me pyetje rreth identitetit të tyre e të ushtarëve të UÇK-së.

Aty i paralajmëruan se do t’i pushkatonin të gjithë.

E në fund të ditës, me urdhër të një komandanti serb, aty u kërkua që gratë e fëmijët të lëshojnë oborrin. U ndalën vetëm burrat.

Vetëm disa metra sa arritën të ecin gratë dhe fëmijët, u dëgjuan të shtënat. Aty i vranë të gjithë, përveç tre personave që shpëtuan të gjallë.

Në atë ditë të tmerrshme të 5 prillit, ndër ta shpëtoi edhe plaku Misin Deliu.

Edhe pse u plagosë tre herë, ai i mbijetoi atij pushkatimi masiv që bëri ushtria paramilitare serbe.

Edhe pse i shtyrë në moshë, ai përpiqet të kujtoi e të rrëfejë për ditën e 5 prillit të 99-ës.

“Prej shtëpisë na kanë rrethuar, në të gjitha anët ishin kanë përreth, në 10 ora të sabahut. Pas orës 10 na kanë pru kolonë, ku ka gjet familje, rob, fëmijë, pleq, 100 vjet. Jonuz Rukolli, Rexhep Rukolli, na kanë mbajt gjithë ditën në shtëpi të Hashimit, deri në ora 5 në akshom”, thotë ai.

Ai rrëfen momentin kur gratë e fëmijët i kanë lënë të lirë e më pas kanë shtënë në burrat që i kishin mbledhur aty.

“Gratë asnjë këtu, dilni, prej dyerve të Hashimit. SI kanë kapërcye, janë kryer ata, neve burrave na kanë qyshue qishtu të tanve. Me këta tanë jam kanë, dy vëllezër, 10 kushëri të mijë, jena kanë familje e një shtëpie. Si jena dalë atje tek gardhi, na kanë gjuajt, unë në tre vena jam plagosë por kam shpëtue”, thotë ai.

E gratë dhe fëmijët u maltretuan duke u detyruar të ecin në këmbë nëpër shumë fshatra të kësaj ane gjatë gjithë natës.

Atë ditë, në oborrin e Hashim Dërgutit arritën të shpëtojnë vetëm tre persona. Sadri Gashi, i cili dy javë më vonë ekzekutohet, plaku Misin Deliu dhe Halili që asokohe ishte vetëm 16 vjeçar.

5 prilli njihet si masakra e Rezallës. 16 vite më parë, ushtria serbe, pa mëshirshëm, ekzekutoi 38 persona. Trupat e tyre i zhdukën më pas. Dy janë gjetur më herët, 28 u kthyen sot dhe për tetë prej tyre ende nuk dihet asgjë, raporton KosovaPress.