Një fëmijë trevjeçar ka humbur jetën në Shtime, në një ngjarje tragjike që, sipas raportimeve në media, dyshohet të ketë ndodhur pasi ai u ngulfat me një copë mishi.

Rasti është konfirmuar edhe në raportin 24-orësh të Policisë së Kosovës, ku bëhet e ditur se Qendra Emergjente e Ferizajt ka njoftuar për një viktimë të gjinisë mashkullore, e cila ishte dërguar pa shenja jete nga Qendra Emergjente e Shtimës, transmeton lajmi.net.

“Me vendim të prokurorit, trupi i pajetë i viktimës është dërguar në Institutin e Mjekësisë Ligjore për obduksion”, thuhet në raportin e Policisë.

Sipas raportimeve mediatike, bëhet fjalë për një fëmijë 3-vjeçar, i cili dyshohet se u ngulfat gjatë ngrënies. Familjarët kanë ndërhyrë menjëherë për t’i ofruar ndihmën e parë dhe e kanë transportuar me urgjencë në Qendrën Emergjente në Shtime.

Mjekët kanë arritur të largojnë copën e mishit nga rrugët e frymëmarrjes, por fëmija kishte mbërritur në gjendje kritike, pa puls dhe pa shenja jete.

Më pas ai është dërguar në Emergjencën e Spitalit Rajonal të Ferizajt, ku ekipet mjekësore kanë vazhduar përpjekjet për reanimim, por nuk kanë arritur t’ia shpëtojnë jetën. Vdekja e tij është konstatuar në orën 19:40.

Me urdhër të Prokurorit për të Mitur, trupi i pajetë është dërguar në Institutin e Mjekësisë Ligjore për kryerjen e obduksionit.

Policia e Kosovës e ka iniciuar rastin si “Hetim i vdekjes”, ndërsa hetimet për sqarimin e plotë të rrethanave të ngjarjes janë duke vazhduar./lajmi.net/