Marrëveshja mes Shteteve të Bashkuara dhe Arabisë Saudite për zhvillimin e një programi civil të energjisë bërthamore do të varet nga vendimi i Riadit për t’iu bashkuar Marrëveshjeve të Abrahamit dhe për të njohur shtetin e Izraelit, ka deklaruar presidenti amerikan Donald Trump.

Sipas raportimeve të BBC-së, Trump ka bërë të ditur se marrëveshja për bashkëpunimin bërthamor me Arabinë Saudite, e cila synon përdorimin paqësor të energjisë bërthamore, nuk do të ecë përpara nëse mbretëria saudite nuk normalizon marrëdhëniet me Izraelin.

“Marrëveshja Bërthamore Civile (Nuk do të ketë pasurim të materialit!)… e cila ka të bëjë vetëm me përdorimin jo-ushtarak… do të miratohet, por është plotësisht e varur nga bashkimi i Arabisë Saudite me Marrëveshjet shumë të respektuara dhe të suksesshme të Abrahamit,” tha Trump në Truth Social.

Deri tani nuk është bërë e qartë nëse ky kusht është pjesë zyrtare e marrëveshjes bërthamore, dokumenti i plotë i së cilës nuk është publikuar, apo nëse është një kërkesë e veçantë e administratës amerikane. Arabia Saudite nuk ka reaguar ende ndaj deklaratave të presidentit amerikan.

Sekretarja e shtypit e Shtëpisë së Bardhë, Karoline Leavitt, ka thënë se Trump e ka ngritur këtë çështje disa herë gjatë bisedimeve me udhëheqësit sauditë.

“Ai ka thënë se nëse ata nuk i bashkohen Marrëveshjeve të Abrahamit, marrëveshja anulohet,” tha ajo. “Pra, ne do të vazhdojmë të zhvillojmë këto biseda me homologët tanë sauditë në të ardhmen.”

Deklaratat e Trump vijnë pas shqetësimeve të ngritura nga ekspertë dhe disa ligjvënës amerikanë, të cilët kanë paralajmëruar se një marrëveshje e tillë mund të krijojë rreziqe për përhapjen e teknologjisë bërthamore në një rajon të tensionuar.

Megjithatë, kundërshtimet në Kongres nuk pritet të kenë ndikim të mjaftueshëm për ta ndalur marrëveshjen, pasi republikanët, të cilët mbështesin Trumpin, kontrollojnë të dy dhomat e legjislaturës amerikane.

Sipas Departamentit të Energjisë të SHBA-së, marrëveshja përfshin një bashkëpunim civil bërthamor dhe një marrëveshje dypalëshe për mbrojtje, të cilat synojnë krijimin e bazës ligjore për një partneritet me vlerë miliarda dollarë.

“Së bashku, këto dy marrëveshje hedhin themelin ligjor për një partneritet shumë-miliardë dollarësh që përparon disa objektiva prioritare ekonomike dhe strategjike, duke përfshirë mospërhapjen bërthamore”, tha një deklaratë nga departamenti.

Ndërkohë, Agjencia Ndërkombëtare e Energjisë Atomike (IAEA) ka bërë të ditur se është në dijeni të planeve për një marrëveshje bashkëpunimi bërthamor civil mes SHBA-së dhe Arabisë Saudite dhe se pret një kërkesë zyrtare për zbatimin e masave të verifikimit.

“Ne mezi presim të marrim kërkesën për një verifikim të tillë dhe të bashkëpunojmë me SHBA-në dhe Mbretërinë e Arabisë Saudite për të siguruar zbatimin e këtyre masave”./lajmi.net/