Rezultati që sollën dje zgjedhjet e parakohshme, solli shumë ndryshime nga ato të 28 dhjetorit.

Ato ulën VV-në në përqindje, ndërkaq rriten pak LDK-në dhe AAK-në, ndërsa PDK mbetet me rezultat stabil.

PDK fitoi përqindjen më të lartë në Drenicë, saktësisht në Komunën e Skenderajt dhe atë të Drenasit.

Në Skenderaj, PDK ka siguruar 12,623 vota, që përbëjnë 79.22 për qind të votave të vlefshme, duke regjistruar rezultatin më të lartë për partinë në nivel komunash.

Ndërkaq, në Drenas, PDK ka marrë 13,743 vota, apo 73.75 për qind, duke grumbulluar mbi një mijë vota më shumë se në Skenderaj, pavarësisht se përqindja është më e ulët.

Dallimi shpjegohet me numrin më të madh të votuesve dhe pjesëmarrjen më të lartë në Drenas. Sipas të dhënave të KQZ-së, në Drenas votuan 19,527 qytetarë, me një pjesëmarrje prej 35.05 për qind, ndërsa në Skenderaj votuan 16,715 qytetarë, me një pjesëmarrje prej 32.48 për qind.

Kjo do të thotë se Skenderaj mbetet komuna ku PDK ka dominimin më të madh në përqindje, ndërsa Drenasi vazhdon të jetë komuna që i sjell partisë numrin më të madh të votave në rajonin e Drenicës. Në të dy komunat, Lëvizja Vetëvendosje është renditur e dyta, me 14.05 për qind në Skenderaj dhe 18.55 për qind në Drenas, duke mbetur shumë prapa PDK-së në dy prej bastioneve më të fuqishme të saj.

Përveç Skenderajt e Drenasit, PDK ka fituar edhe në Malishevë, pas mbështetjes që kryetari i Nismës, Fatmir Limaj i ka dhënë PDK-së.

Në këtë komunë, PDK ka marrë 40.27% të votave. /Lajmi.net/