Polici Muhamed Lika është vrarë mbrëmë me armë zjarri para banesës së tij në Kaçanik, ngjarje kjo tronditëse që ka shkaktuar reagime të shumta.

Kolegu i tij, Naim Kodra, ka bërë një postim prekës në rrjetet sociale, ku e përkujton Likën si një njeri të fjalës, një polic të përkushtuar dhe një atdhetar të palëkundur.

“Një dorë kriminale dhe tinzare e ndau nga ne njërin prej zyrtarëve policorë më të mirë që kishte Kosova. U nda nga ne Muhamed Lika”, shkroi Kodra.

Ai tregoi se vetëm pak kohë më parë ishin mbledhur bashkë në një iftar gjatë muajit të shenjtë të Ramazanit, ku kishin ndarë kujtime nga lufta dhe përditshmëria në Policinë e Kosovës.

Kodra shprehu keqardhjen që angazhimet policore nuk ua mundësuan një takim tjetër, duke theksuar se kjo mbeti nata e fundit që u panë.

“Do të të kujtojmë gjithmonë si shok, koleg dhe mbi të gjitha si një burrë që nuk e ndali asnjëherë kontributin për Kosovën. Pusho i qetë, Muhamed! Të qoftë i lehtë dheu i Kosovës!”, përfundoi ai.

Vrasja e Likës ka tronditur opinionin publik dhe ka ngritur shqetësime për sigurinë e zyrtarëve të Policisë së Kosovës.

Autoritetet janë duke hetuar rastin për të zbardhur rrethanat e plota të kësaj tragjedie.