Presidenti i UEFA-s, Aleksander Ceferin ka lavdëruar bashkëpunimin ndërmjet dy federatave të futbollit, asaj të Shqipërisë dhe të Serbisë për organizimin e Kampionatit Evropian për grupmoshat U21 duke thënë se është shembulli më i qartë se futbollit është sport i cili nuk njeh kufij.

“Ne e shikojmë një turne si EURO U21, i organizuar bashkërisht nga Shqipëria dhe Serbia, si një shembull i shkëlqyer për të na kujtuar se nuk ka kufij të vërtetë në futbollin evropian”, ka thënë Ceferin në Kongresin e UEFA-s që po zhvillohet në Beograd.

Ai ka shtuar se futbolli është sport i cili flet një gjuhë universale dhe shkon përtej kufijve, përcjellë KosovaPress.

“Futbolli është më shumë se një sport: ai është një pasqyrë dhe një model i shoqërisë. Ai flet një gjuhë universale që shkon përtej kufijve, bashkon komunitetet dhe frymëzon ëndrrat.”

Kampionati Evropian i futbollit për grupmoshat U21 do të zhvillohet në vitin 2027.