Binance ka prezantuar tregtimin e aksioneve amerikane, duke u dhënë përdoruesve të kualifikuar qasje në më shumë se 7,000 aksione dhe ETF të listuara në SHBA.

Kompania njoftoi gjithashtu se së shpejti do të prezantojë bStocks, letra me vlerë të tokenizuara që përfaqësojnë aksione dhe ETF të përzgjedhura amerikane, një hap i ri në vizionin e saj për të ndërtuar një platformë të integruar për investim, tregtim dhe financë on-chain.

Sipas Binance, zgjerimi i ofertës mbështetet në bindjen se përfshirja financiare rritet kur qasja në mundësi investimi bëhet më e thjeshtë dhe më e integruar.

“Ne kemi vendosur si objektiv të arrijmë 3 miliardë përdoruesit e ardhshëm dhe, për ta bërë këtë, duhet ta bëjmë më të lehtë qasjen në mundësi investimi në klasa të ndryshme asetesh, diversifikimin e portofolit dhe kalimin mes investimeve tradicionale dhe financës on-chain”, tha Yi He, bashkëthemeluese dhe bashkë-CEO e Binance.

Shërbimi i ri ofrohet përmes Nest Trading Limited, broker-dealer i Binance i licencuar në Abu Dhabi Global Market (ADGM), dhe zgjeron platformën shumëasetëshe të kompanisë duke bashkuar tregtimin e aksioneve amerikane dhe rrugën drejt tokenizimit në një përvojë të vetme për përdoruesit.

Përdoruesit e kualifikuar do të mund të tregtojnë aksione amerikane pa komision, të blejnë aksione të pjesshme duke filluar nga vetëm 5 dollarë, si dhe të kenë pronësi të drejtpërdrejtë mbi aksionet e mbajtura nga një ndërmjetës i licencuar dhe i rregulluar në SHBA. Kjo përfshin edhe të drejtën për të përfituar dividendë dhe veprime të tjera korporative kur ato janë të aplikueshme.

Një pjesë e aksioneve do të jetë e disponueshme edhe për tregtim 24 orë në ditë, pesë ditë në javë. Blerjet do të kryhen kryesisht përmes USDC, ndërsa do të mbështeten gjithashtu BNB, USDT, USD1 dhe $U. Të ardhurat nga shitjet do të paguhen në USDC.

Binance do të ofrojë gjithashtu shërbimin Fully Paid Securities Lending (FPSL), i cili u mundëson përdoruesve të kualifikuar të gjenerojnë të ardhura pasive duke huazuar aksionet që zotërojnë.

Në javët e ardhshme dhe në varësi të miratimeve rregullatore, Binance planifikon të prezantojë edhe bStocks, letra me vlerë të tokenizuara që përfaqësojnë aksione dhe ETF të përzgjedhura amerikane. Këto instrumente do të emetohen nga BTECH Holdings Ltd, një kompani me qëllim të veçantë e regjistruar në Abu Dhabi Global Market.

Pas lansimit, bStocks do të jenë të disponueshme për tregtim në Binance Exchange.

Sipas kompanisë, kombinimi i pronësisë tradicionale të aksioneve me asetet e tokenizuara mund të krijojë një urë mes tregjeve tradicionale financiare dhe financës on-chain. Kjo mund të mundësojë qasje të vazhdueshme në asetet e tokenizuara dhe përdorime të reja brenda ekosistemit blockchain, përfshirë huadhënien dhe ofrimin e likuiditetit.

“Tokenizimi ka potencialin të transformojë tregjet financiare duke u dhënë përdoruesve më shumë kontroll, më shumë fleksibilitet dhe në fund më shumë liri financiare. Ne shohim një mundësi të madhe për t’i bërë asetet financiare më të qasshme, më të dobishme dhe më të lidhura mes tregjeve tradicionale dhe atyre digjitale”, tha Richard Teng, bashkë-CEO i Binance.

Me këtë zgjerim, Binance po vazhdon strategjinë e saj për të afruar investimet tradicionale dhe financën on-chain në një platformë të vetme, duke shtuar aksionet amerikane dhe, së shpejti, edhe letrat me vlerë të tokenizuara në gamën e produkteve të saj.