Karim Benzema ka pranuar se shikon xhirime të ish yllit të Real Madridit dhe Brazilit, Ronaldo, para ndeshjeve.

Francezi shënoi dy herë në fitoren 4:2 ndaj Villarrealit të shtunën duke barazuar bilancin e 37-vjeçarit, prej 104 golash për Los Blancos.

Mirëpo, ish sulmuesi i Olympique Lyon ka thënë se do të vazhdojë të inspirohet nga ish ylli i Interit dhe Milanit. “Jam shumë i lumtur sepse të barazoj një futbollist me status të tij është thjesht e mrekullueshme”, deklaroi Benzema për të përditshmen sportive spanjolle As.

“Ronaldo është, për mua, së bashku me Zidanen, futbollisti më i mirë në histori. Jam shumë krenar që kam shënuar numrin e njëjtë të golave me të dhe më inkurajon të punoj edhe më shumë. Ai më inspiroi në shumë aspekte. Së pari, dëshira e tij për të shënuar gola. Por, po ashtu kam mësuar shumë prej tij sa i përket lëvizjeve para golit. E kam përcjell Ronaldon si fëmijë dhe ende i shikoj xhirimet e tij para ndeshjeve”, përfundoi Benzema.