Bashkimi Evropian po përgatit paketën e tetëmbëdhjetë të sanksioneve ndaj Rusisë dhe ndër masat që po shqyrtohen janë përjashtimi i më shumë se njëzet bankave ruse nga sistemi i pagesave SWIFT, një ulje e mëtejshme e kufirit të çmimit për naftën ruse dhe një ndalim zyrtar i gazsjellësit Rrjedha Veriore.

Informacioni është publikuar nga Bloomberg, duke cituar burime brenda institucioneve evropiane, raporton KosovaPress.

Përveç përjashtimit të bankave nga SWIFT, është planifikuar edhe një ndalim shtesë i transaksioneve financiare për rreth njëzet banka ruse, si dhe kufizime të reja tregtare me një vlerë totale prej rreth 2.5 miliardë euro.

Një nga elementët kryesorë të paketës së re është ulja e tavanit të çmimit të naftës ruse nga 60 dollarë aktuale në rreth 45 dollarë për fuçi. Ky kufi aktualisht ndalon kompanitë nga vendet e G7 të transportojnë dhe sigurojnë naftën ruse nëse çmimi i shitjes është më i lartë se ai i përcaktuar. Për të zbatuar këtë reduktim, do të nevojitet mbështetja e Shteteve të Bashkuara të Amerikës.

Gjithashtu, parashikohet zgjerimi i sanksioneve për “flotën hije” ruse, si dhe kufizime shtesë për bankat që lehtësojnë financimin e makinës së luftës dhe për Fondin e Investimeve Direkte Ruse.

Paketa e re duhet të përfshijë gjithashtu dispozita për të mbrojtur kompanitë evropiane nga pretendimet e mundshme të arbitrazhit bazuar në marrëveshjet dypalëshe të investimeve me Rusinë.

Ndër masat më të ashpra dhe më të rëndësishme politikisht nga paketa i referohet ndalimit zyrtar të gazsjellësit Rrjedha e Veriut. Duke sanksionuar këtë sistem, BE-ja do të konfirmonte qëllimin strategjik afatgjatë – t’i jep fund varësisë nga gazi rus dhe të ndërpresë në mënyrë të pakthyeshme projektet energjetike me Moskën.

Më 23 maj, Komisioni Evropian zhvilloi konsultime të mbyllura me përfaqësuesit e vendeve anëtare për të rënë dakord mbi përmbajtjen dhe kohën e zbatimit të paketës së 18-të të sanksioneve.

Bashkimi Evropian dhe Britania njoftuan paketën e 17-të të sanksioneve kundër Rusisë më 20 maj. Lista e zezë përfshin individë që mundësojnë flotën, kompani për transportin e naftës bruto dhe produkteve të naftës, përfshirë ato nga Emiratet e Bashkuara, Turqia dhe Hong Kongu, si dhe një sigurues i madh cisterna.

Paketa e re sanksionon gjithashtu 45 kompani dhe individë rusë që furnizojnë ushtrinë ruse me drone, armë, municione, pajisje ushtarake, komponentë kritikë dhe mbështetje logjistike.

Përveç kësaj, Këshilli i Bashkimit Evropian shtoi 31 persona juridikë në listën e atyre që i nënshtrohen kufizimeve më të rrepta në eksportin e mallrave dhe teknologjisë me përdorim të dyfishtë, për shkak të mbështetjes së tyre për kompleksin ushtarak dhe industrial rus.

Disa janë të vendosura në vende të treta si Serbia, Emiratet e Bashkuara Arabe, Turqia, Vietnami dhe Uzbekistani dhe janë përfshirë në anashkalimin e kufizimeve të eksportit, duke përfshirë mjetet ajrore pa pilot ose mjetet e makinerisë me kontroll numerik kompjuterik.