Autoritetet kolumbiane kanë bërë të ditur se kanë arrestuar një nga të dyshuarit kryesorë si drejtues të mafias italiane ‘Ndrangheta’ në Amerikën Latine, i akuzuar për mbikëqyrje të dërgesave të kokainës dhe menaxhim të rrugëve të trafikut të paligjshëm drejt Evropës.

I arrestuari është Giuseppe Palermo, i njohur edhe me nofkën “Peppe”, një shtetas italian që kërkohej me njoftim të kuq nga Interpoli, i vlefshëm në 196 shtete të botës, transmeton lajmi.net

Palermo u kap në rrugët e kryeqytetit kolumbian, Bogotá, në një operacion të koordinuar mes autoriteteve kolumbiane, italiane dhe britanike, si dhe me mbështetjen e Europol-it, agjencia e zbatimit të ligjit të Bashkimit Evropian.

Sipas kreut të policisë kolumbiane, Carlos Fernando Triana, Palermo besohet të jetë pjesë e “një prej celulave më të lidhura ngushtë” të mafias italiane ‘Ndrangheta, që operon në trafikun ndërkombëtar të drogës.

Operacioni vjen si pjesë e përpjekjeve të përbashkëta për të goditur rrjetet kriminale transnacionale që kontrollojnë trafikun e drogës nga Amerika Latine drejt Evropës./lajmi.net/