Sipas raporteve nga Italia, Al-Hilal nuk është dorëzuar në përpjekjet për të transferuar mbrojtësin e Milanit, Theo Hernandez. Pavarësisht se lojtari francez refuzoi më herët një ofertë të majme – përfshirë një kontratë rreth 18 milionë euro në sezon – skuadra saudite synon ta rikthejë në tryezë marrëveshjen.

Al-Hilal, tani i drejtuar nga Simone Inzaghi, kishte ofruar 35 milionë euro për Theon, shifër që thuhet se përmbushte kërkesat e Milanit. Megjithatë, mungesa e gatishmërisë së lojtarit për të kaluar në Lindjen e Mesme pengoi marrëveshjen.

Ndërkohë, Theo ka qenë në bisedime edhe me Atletico Madridin, por mungesa e një marrëveshjeje mes klubeve ndaloi transferimin. Është përmendur gjithashtu një shkëmbim i mundshëm me Juventusin për Dusan Vlahovic, me të dy lojtarët të vlerësuar rreth 30 milionë euro.

“Sky Sport Italia” raporton se përfaqësues të Al-Hilal kanë udhëtuar sërish në Milano për të tentuar bindjen e lojtarit, edhe pse kjo mbetet sfida kryesore në këtë operacion.