Futbolli asnjëherë nuk i ndalë befasitë. Nou Camp është duke përgatitur ovacione për kapitenin e Real Madridit, Iker Casillas gjatë El Clasicos të shtunën. Po, mirë e lexuat, ovacione për portierin e skuadrës rivale.

Sipas të përditshmes sportive madrilene AS, në rrjetet sociale Twitter dhe Facebook, është shpërndarë ideja që përkrahësit e Barcelonës të shprehin përkrahje për Casillasin, i cili spekulohet se mund të transferohet në Nou Camp nëse vazhdon të ketë rolin e rezervistit në Real Madrid.

El Clasico i së shtunës, në kuadër të xhiros së dhjetë në La Ligë pritet të nisë me Casillasin si rezervist pasi trajneri Carlo Ancelotti ka vendosur që kapiteni i Spanjës të luajë në duelet e Ligës së Kampionëve kurse në ligë, Diego Lopez është zgjedhja e parë.

Përveç ovacioneve për Casillasin, Nou Camp thuhet se është duke përgatitur të shpalos një mozaik me mbishkrimin “Forca Tito” në përkrahje për ish trajnerin Tito Vilanova i cili është duke luftuar sëmundjen e kancerit.