Aleanca rikonfirmon qëndrimin për Specialen: Do të votojmë pro zhbërjes së saj

Kryesia e Aleancës ka mbajtur të martën mbledhjen e radhës, ku ka diskutuar zhvillimet e fundit politike dhe prioritetet e veprimit të kësaj partie në Kuvendin e Kosovës. Në këtë takim, Aleanca ka rikonfirmuar qëndrimin e saj kundër Gjykatës Speciale, duke theksuar se nuk e ka votuar themelimin e saj dhe se do të votojë…

Lajme

17/11/2026 20:18

Kryesia e Aleancës ka mbajtur të martën mbledhjen e radhës, ku ka diskutuar zhvillimet e fundit politike dhe prioritetet e veprimit të kësaj partie në Kuvendin e Kosovës.

Në këtë takim, Aleanca ka rikonfirmuar qëndrimin e saj kundër Gjykatës Speciale, duke theksuar se nuk e ka votuar themelimin e saj dhe se do të votojë pro zhbërjes së saj në çdo rast kur të paraqitet një mundësi e tillë.

Përmes një njoftimi, Aleanca ka bërë të ditur se do të vazhdojë angazhimin në Kuvend, me fokus në mbrojtjen e interesave të qytetarëve dhe trajtimin e çështjeve me rëndësi për vendin.

Ndër prioritetet e përmendura janë sektori i energjisë, të cilin Aleanca e konsideron shtyllë të zhvillimit ekonomik dhe sigurisë strategjike, mbështetja e ndërmarrjeve të vogla dhe të mesme, si dhe fuqizimi i prodhimit vendor.

Po ashtu, kjo parti ka theksuar nevojën për përmirësimin e gjendjes në shëndetësi dhe arsim, si dhe luftimin e korrupsionit, nepotizmit, klientelizmit dhe politizimit të administratës publike.

Një pjesë e diskutimeve i është kushtuar edhe Buxhetit për vitin 2027. Kryesia e Aleancës ka kërkuar transparencë dhe sqarime për ndarjen e mjeteve buxhetore, duke shprehur shqetësim për mungesën e investimeve dhe mosrealizimin e projekteve, veçanërisht atyre kapitale.

Ndërkaq, Grupi Parlamentar i Aleancës pritet të kërkojë llogaridhënie në Kuvend për disa çështje që kjo parti i konsideron me interes nacional dhe social.

Në mesin e tyre janë projekti i Hekurudhës Kosovë–Shqipëri, zbatimi i Kontratës Kolektive dhe amendamentet e gjashtëpikëshit. /Lajmi.net/