Protesta për drejtësi për Arlinda Zekajn ka vazhduar edhe të enjten në Prishtinë, duke shënuar ditën e nëntë të mobilizimit qytetar pas vrasjes së saj.

Protestuesit kanë bllokuar rrugën para stacionit policor në kryeqytet, ku kanë vendosur edhe një parullë me mbishkrimin: “Gjumi s’ka me ju marrë”, transmeton lajmi.net.

Përmes kësaj proteste, qytetarët po kërkojnë përgjegjësi institucionale dhe drejtësi për vrasjen e 25-vjeçares, e cila u vra më 25 tetor në Vitomiricë të Pejës nga ish-kunati i saj.

Rasti ka nxitur reagime të shumta, pasi Arlinda Zekaj, pak ditë para se të vritej, u kishte drejtuar një letër institucioneve, duke paralajmëruar se jeta e saj ishte në rrezik.

Ajo ishte paraqitur edhe në polici për të denoncuar ish-bashkëshortin për kanosje, por vrasja ndodhi pasi ishte kthyer nga Policia.

Ngjarja ka shkaktuar reagime të mëdha publike dhe ka vënë në pikëpyetje reagimin e institucioneve përgjegjëse për mbrojtjen e viktimave të dhunës.

Si pasojë e zhvillimeve pas rastit, drejtori i Përgjithshëm i Policisë së Kosovës, Gazmend Hoxha, ka dhënë dorëheqje, ndërsa disa prokurorë dhe zyrtarë policorë janë suspenduar.

Ndërkohë, për të shtunën është paralajmëruar një protestë mbarëkombëtare në Prishtinë, e cila pritet të nisë në orën 12:00, nga Katedralja “Nënë Tereza”.

Protesta synon të mbledhë qytetarë nga mbarë Kosova, për të kërkuar drejtësi për Arlinda Zekajn dhe përgjegjësi nga institucionet për trajtimin e rasteve të dhunës ndaj grave./lajmi.net/