Shqipëria ka projektbuxhetin më të lartë për vitin 2027 krahasuar me Kosovën dhe Maqedoninë e Veriut e Malin e Zi.

Sipas të dhënave të paraqitura në projektbuxhetet për vitin e ardhshëm, Shqipëria ka planifikuar shpenzime prej rreth 10.7 miliardë eurosh, Maqedonia e Veriut 7.22 miliardë euro, ndërsa Kosova 4.27 miliardë euro.

Krahasimi tregon dallime të konsiderueshme në madhësinë e buxheteve të këtyre 3 vendeve, të cilat kanë edhe numër të ndryshëm banorësh.

Kosova, me rreth 1.59 milionë banorë, ka projektbuxhet prej 4.27 miliardë eurosh për vitin 2027. Bazuar në këto shifra, shpenzimet e planifikuara buxhetore arrijnë në rreth 2,686 euro për banor.

Shqipëria, me rreth 2.36 milionë banorë sipas të dhënave të përdorura në krahasim, ka projektbuxhet prej 10.7 miliardë eurosh. Kjo shumë përkthehet në rreth 4,534 euro për banor, duke e renditur vendin të parin mes 3 shteteve për këtë tregues.

Ndërkohë, Maqedonia e Veriut, me rreth 1.83 milionë banorë, ka paraparë shpenzime prej 7.22 miliardë eurosh. Përllogaritur sipas popullsisë, kjo përbën rreth 3,945 euro për banor.

Ndërsa, Mali i Zi, sipas Strategjisë Fiskale 2024–2027 të miratuar nga Qeveria më 5 shtator 2024, kishte projektuar shpenzime buxhetore prej 3.364 miliardë eurosh për vitin 2027. Me një popullsi të vlerësuar prej 623,115 banorësh në mesin e vitit 2025, kjo shumë përkthehet në rreth 5,399 euro për banor.

Megjithatë, shifra për Malin e Zi është projeksion i një dokumenti afatmesëm dhe jo projektbuxhet përfundimtar i miratuar për vitin 2027.

Në krahasim është përfshirë edhe Serbia, por me buxhetin e vitit 2026, pasi të dhënat për projektbuxhetin e vitit 2027 nuk janë përfshirë ende.

Buxheti i Serbisë për vitin 2026 është rreth 23.5 miliardë euro, ndërsa popullsia e përdorur në krahasim është 6.64 milionë banorë. Kjo jep rreth 3,539 euro shpenzime buxhetore për banor.

Sipas informacionit të paraqitur në krahasim, Serbia ende nuk e ka publikuar projektbuxhetin për vitin 2027, pas zgjedhjeve parlamentare të mbajtura në tetor.

Megjithatë, krahasimi i buxheteve nuk pasqyron domosdoshmërisht nivelin e zhvillimit ekonomik apo mirëqenien e qytetarëve, pasi shpenzimet publike varen nga struktura e financave shtetërore, politikat fiskale dhe detyrimet buxhetore.