Gjykata Supreme e Kosovës ka marrë një vendim të rëndësishëm për të gjithë shoferët e vendit, duke shfuqizuar dispozitën e një udhëzimi administrativ të Ministrisë së Punëve të Brendshme, e cila i lejonte Policisë ta mbante patentë-shoferin e qytetarëve deri në përfundimin e masës së ndalimit të vozitjes.
Sipas vendimit të publikuar sot, më 30 tetor 2026, Policia e Kosovës nuk mund ta mbajë fizikisht patentë-shoferin e një qytetari për më shumë se tetë ditë, edhe nëse ndaj tij është shqiptuar masa e ndalimit të drejtimit të automjetit për tre, gjashtë apo dymbëdhjetë muaj.
Gjykata Supreme ka shpallur të paligjshëm dhe ka shfuqizuar paragrafin 3 të nenit 17 të Udhëzimit Administrativ Nr. 05/2023 të Ministrisë së Punëve të Brendshme, i cili përcaktonte se patentë-shoferi mund t’i kthehej qytetarit vetëm pasi të përfundonte masa mbrojtëse.
Vendimi është marrë pas një padie të paraqitur nga 28 paditës kundër Ministrisë së Punëve të Brendshme – Policisë së Kosovës.
Çfarë ndryshon për qytetarët?
Deri më tani, sipas dispozitës së shfuqizuar, nëse një qytetari i ndalohej vozitja për gjashtë muaj, Policia mund t’ia mbante edhe dokumentin fizik të patentë-shoferit gjatë gjithë kësaj periudhe.
Me vendimin e ri të Gjykatës Supreme, kjo praktikë nuk ka më bazë në dispozitën e shfuqizuar.
Kjo nuk do të thotë se qytetari fiton të drejtën të vozisë gjatë periudhës së ndalimit. Masa mbrojtëse mbetet në fuqi, por dokumenti fizik duhet t’i kthehet brenda afatit të përcaktuar me ligj.
Gjykata Supreme ka bërë një dallim të qartë ndërmjet dy veprimeve juridike: marrjes së përkohshme të patentë-shoferit dhe ndalimit të drejtimit të automjetit.
Sipas Gjykatës, këto janë dy masa të ndryshme dhe nuk mund të trajtohen si një e vetme.
Duke u mbështetur në nenin 244 të Ligjit Nr. 08/L-186 për Rregullat e Trafikut Rrugor, Supremja ka konstatuar se mbajtja e përkohshme e dokumentit nga Policia nuk mund të zgjasë më shumë se tetë ditë.
Gjykata ka vlerësuar gjithashtu se një udhëzim administrativ nuk mund t’i japë Policisë kompetenca më të gjera sesa ato që i përcakton ligji.
A mund të vozitet jashtë Kosovës?
Vendimi ka rëndësi të veçantë edhe për qytetarët që udhëtojnë jashtë Kosovës, pasi ata nuk do të mbeten pa dokumentin fizik gjatë gjithë periudhës së ndalimit.
Megjithatë, kthimi i patentë-shoferit nuk nënkupton automatikisht të drejtën për të vozitur jashtë Kosovës. Kjo varet nga vlefshmëria e dokumentit, natyra e masës së shqiptuar dhe legjislacioni i shtetit ku qytetari dëshiron ta drejtojë automjetin.
Ndërkohë, Gjykata Supreme ka refuzuar kërkesën për shfuqizimin e paragrafëve 1 dhe 2 të nenit 17 të të njëjtit udhëzim administrativ, duke konstatuar se ato rregullojnë vetëm procedurat për administrimin e dokumentit dhe lëshimin e vërtetimit për marrjen e përkohshme të tij.
Me këtë vendim, Gjykata Supreme i ka vendosur kufi praktikës së mbajtjes së patentë-shoferëve për muaj të tërë, duke konfirmuar se ndalimi i vozitjes dhe mbajtja fizike e dokumentit nuk janë e njëjta gjë.
