Fitorja e Listës së Studentëve në Serbi mund të sjellë ndryshime në skenën politike të vendit, përfshirë edhe mënyrën se si Beogradi do t’i qaset Kosovës dhe Dialogut të Brukselit. Analisti serb Dushan Janjiq shpreson që udhëheqja e re të mos ndjekë modelin politik të presidentit aktual, Aleksandar Vuçiq, por të sjellë ndryshime në politika dhe në mënyrën e zhvillimit të negociatave.

Janjiq ka vlerësuar se qeveria e ardhshme do të duhet të formojë një ekip të ri negociator dhe të marrë kohë për t’u njohur me procesin e dialogut, duke theksuar nevojën për më shumë transparencë në bisedimet me Kosovën, transmeton lajmi.net.

“Shpresoj se nuk do ta ndjekin metodologjinë dhe mënyrën e Vuçiqit për ta menaxhuar të gjithë situatën. Ata duhet t’i ndryshojnë politikat e tyre dhe, në veçanti, modelin e punës. Qeveria e re nuk do të jetë në gjendje të zhvillojë bisedime sekrete. Brukseli duhet t’i harrojë takimet e nivelit të lartë që mbahen me dyer të mbyllura”, deklaroi Janjiq.

Sipas analistit serb, ndryshimi i qeverisë në Beograd mund të ndikojë edhe në formatin e negociatave, ndërsa qasja e re duhet të bazohet në një proces më pragmatik dhe transparent.

Ndërkohë, gazetari gjerman Michael Martens ka kritikuar programin politik të Listës së Studentëve, duke e cilësuar atë si “të tmerrshëm”. Sipas tij, programi pasqyron të njëjtën mendësi politike si ajo e presidentit aktual serb, Aleksandar Vuçiq.

Janjiq: Lista Serbe duhet të gjejë një drejtim të ri politik

Janjiq ka folur edhe për të ardhmen e Listës Serbe, duke vlerësuar se ndryshimet e mundshme politike në Beograd mund ta detyrojnë këtë subjekt të rishikojë orientimin e tij politik.

Sipas tij, Lista Serbe nuk do të jetë partnere as e shumicës së re parlamentare dhe as e qeverisë së ardhshme në Serbi, prandaj do të duhet të kërkojë një qasje të re.

“Duke parë atë që po bën Vuçiq me partinë e tij, do të thoja se ata do ta braktisin atë. Lista Serbe duhet të gjejë një qasje të re politike, sepse nuk është partnere e shumicës së re apo e qeverisë së re”, tha Janjiq.

Deklaratat e analistit serb vijnë në një kohë kur vëmendja është përqendruar te zhvillimet e brendshme politike në Serbi dhe ndikimi që ato mund të kenë në raportet me Kosovën, si dhe në vazhdimin e Dialogut të Brukselit. Qasja e qeverisë së ardhshme ndaj këtij procesi mbetet një nga çështjet që pritet të përcaktojë zhvillimet e ardhshme politike në rajon./lajmi.net/