Fëmijët me aftësi të kufizuara pritet të përfitojnë një mbështetje financiare të rregullt prej 100 eurosh në muaj, pas një nisme që ka kaluar me sukses filtrin e parë institucional.

Komiteti për Politikë dhe Financa (KPF) ka votuar sot dhe ka rekomanduar për në Kuvendin Komunal të Obiliqit propozimin për ndarjen e kësaj ndihme mujore.

Kjo paketë mbështetëse financiare synon të përfshijë:

Fëmijët me aftësi të kufizuara;

Fëmijët me çrregullime në zhvillim;

Personat e prekur nga Sindroma Down;

Fëmijët me Autizëm dhe forma të tjera të aftësisë së kufizuar.

Pas marrjes së mbështetjes dhe votimit në Komitetin për Politikë dhe Financa, propozimi tashmë i kalon zyrtarisht Kuvendit Komunal, ku pritet të shqyrtohet dhe të hidhet në votim përfundimtar nga asamblistët për të marrë miratimin e plotë.