Kandidati për deputet nga LDK, Avdullah Hoti, ka kritikuar kryeministrin në detyrë Albin Kurti pas një paraqitjeje publike, duke thënë se ai nuk arriti të përmendë asnjë projekt serioz e madhor të realizuar gjatë viteve të qeverisjes së tij.

Hoti tha se gazetari Fidan Rama e pyeti Kurtin për tri projektet me të cilat krenohet pas viteve në pushtet, por sipas tij, përgjigjja ishte “zbuluese për qeverisjen e tij të zbrazët”, raporton lajmi.net

“Kur nuk ke rezultate, shpik armiq. Kur nuk ke projekte, prodhon justifikime”, ka shkruar Hoti.

Postimi i plotë:

Gazetari Fidan Rama e pyeti Kurtin për tri projektet me të cilat krenohen pas gjithë këtyre viteve në pushtet. Përgjigjja ishte zbuluese për qeverisjen e tij të zbrazët, por edhe dëshpëruese: nuk arriti të përmendë asnjë projekt serioz dhe madhor që ka ndryshuar jetën e qytetarëve.
Rrjedhimisht, u kthye te zanati i tij i vetëm prej se është në politikë: propaganda, mashtrimi dhe fajësimi i të tjerëve.
Kur nuk ke rezultate, shpik armiq. Kur nuk ke projekte, prodhon justifikime.
Por propaganda nuk mund t’i fsheh milionat e shpërndara me tenderë njëburimorë. Nuk i arsyeton kontratat e negocuara në WhatsApp. Nuk i zhduk dyshimet për keqpërdorimin e parasë publike.
Vetëm gjatë vitit 2025, Auditori i Përgjithshëm ka referuar 80 lëndë në Prokurori bazuar në gjetjet e auditimeve në institucione të ndryshme.
Koha e propagandës po mbaron. Koha e llogaridhënies po afrohet. Dhe për dallim nga konferencat për shtyp, para ligjit nuk mjafton propaganda./Lajmi.net/