Policia e Kosovës ka zhvilluar sot një aksion të koordinuar në qytetin e Prizrenit kundër parkimeve të parregullta, duke shqiptuar 106 gjoba brenda vetëm dy orësh.

Sipas njoftimit zyrtar, aksioni është realizuar në intervalin kohor 10:00–12:00 nga patrullat e Stacionit Policor në Prizren, Prizren-Veri dhe Njësia për Rregullimin e Komunikacionit Rrugor. Kontrollet janë përqendruar kryesisht në qendrën e qytetit, ku parkimet e parregullta vazhdojnë të paraqesin problem të theksuar, transmeton lajmi.net.

Autoritetet theksojnë se parkimet në kundërshtim me rregullat pengojnë qarkullimin normal të automjeteve dhe këmbësorëve, si dhe krijojnë rrezik për sigurinë në trafik. Për këtë arsye, Policia ka paralajmëruar intensifikim të kontrolleve edhe në ditët në vijim.

Nga Policia u bëhet thirrje qytetarëve që të respektojnë rregullat e komunikacionit dhe të tregojnë përgjegjësi në rrugë, në mënyrë që të kontribuojnë në një mjedis më të sigurt dhe më të rregullt për të gjithë./lajmi.net/