Policia e Kosovës ka intensifikuar përgatitjet dhe angazhimet për mbarëvajtjen e procesit zgjedhor në zgjedhjet e parakohshme për Kuvendin e Republikës së Kosovës.

Në kuadër të këtij angazhimi, Drejtoria e Përgjithshme e Policisë së Kosovës ka mbajtur dy takime zyrtare koordinuese, ku janë diskutuar planifikimet dhe detyrat operative për garantimin e sigurisë në të gjithë vendin, transmeton lajmi.net.

Takimi i parë u zhvillua me drejtorë rajonal dhe drejtorë të departamenteve të Policisë së Kosovës, ndërsa takimi i dytë përfshiu edhe përfaqësues të organeve të drejtësisë, Komisionit Qendror të Zgjedhjeve dhe institucioneve ndërkombëtare, të cilët u informuan mbi masat policore dhe koordinimin ndërinstitucional për procesin zgjedhor.

Drejtori i Përgjithshëm, kolonel Gazmend Hoxha, vlerësoi përgatitjet e deritashme, duke theksuar se procesi ka qenë deri më sot i qetë dhe pa incidente. Ai theksoi rëndësinë e mbikëqyrjes dhe angazhimit me profesionalizëm dhe integritet nga të gjithë menaxherët rajonal dhe qendror të Policisë, për të siguruar një proces zgjedhor të sigurt dhe transparent.

Nga Drejtoria për Planifikim dhe Vlerësim Operacional u shpalos urdhri operativ, duke përfshirë detyrat, angazhimet dhe bashkëpunimin brenda strukturës policore dhe me institucionet tjera relevante.

Policia e Kosovës, në bashkëpunim me institucionet vendore dhe ndërkombëtare, mbetet e përkushtuar në garantimin e ushtrimit të lirë dhe demokratik të së drejtës së votës për të gjithë qytetarët. Policia inkurajon qytetarët që të raportojnë çdo rast të dyshuar ose veprim të kundërligjshëm lidhur me procesin zgjedhor përmes numrit emergjent 192, adresës elektronike [email protected] apo në stacionet policore më të afërta.

Njoftimi i plotë:

Angazhimi institucional i Policisë së Kosovës për sigurinë dhe mbarëvajtjen e zgjedhjeve të parakohshme për Kuvendin e Republikës së Kosovës

Prishtinë, më 26 dhjetor 2025

Policia e Kosovës ka hartuar dhe është në zbatim të urdhrit operativ ‘Zgjedhjet e parakohshme për Kuvendin e Republikës së Kosovës’.

Në ambientet e Drejtorisë së Përgjithshme të Policisë së Kosovës sot janë mbajtur dy takime zyrtare informuese dhe koordinuese lidhur me planifikimin, zbatimin dhe koordinimin e urdhrit operativ lidhur me procesin zgjedhjeve të parakohshme për Kuvendin e Republikës së Kosovës.

Takimi i parë u mbajt me drejtorë rajonal dhe drejtorë të departamenteve të Policisë së Kosovës, ndërsa në takimin e dytë morën pjesë edhe përfaqësues të organeve të drejtësisë, Komisionit Qendror të Zgjedhjeve, dhe të institucioneve të tjera relevante ndërkombëtare, të cilat u njoftuan lidhur me përgatitjet dhe planifikimet policore për mbarëvajtje në aspektin e sigurisë të procesit zgjedhor dhe koordinimit ndërinstitucional.

Drejtori i Përgjithshëm kolonel Gazmend HOXHA, foli rreth përgatitjeve të deritashme, rreth angazhimeve policore në procesin zgjedhor (fushatë), në aspektin e sigurisë. Ndër të tjera u potencua se, procesi deri më sot ka qenë i qetë dhe pa incidente. Ndër të tjera, pos angazhimeve konkrete nga zyrtarë policorë në mbarëvajtje të procesit zgjedhor në aspekt të sigurisë, nga drejtori Hoxha, u kërkua nga të gjithë menaxherët rajonal e ata qendrorë mbikëqyrje dhe porosi konkrete që policia të kryej edhe këtë aktivitet, angazhim me profesionalizëm e integritet sa më të lartë.

Më pas nga Drejtoria për Planifikim dhe Vlerësim Operacional, u shpalos urdhri operativ, konkretisht detyrat, angazhimet, bashkëpunimi dhe koordinimi i aktiviteteve brenda strukturës policore dhe me institucione tjera relevante.

Policia e Kosovës, në bashkëpunim me institucionet vendore dhe ndërkombëtare, mbetet e përkushtuar në zbatimin e detyrave dhe përgjegjësive të saj ligjore në mënyrë profesionale, transparente dhe të paanshme, me qëllim të garantimit të ushtrimit të lirë dhe demokratik të së drejtës së votës për të gjithë qytetarët.
Me këtë rast, Policia e Kosovës inkurajon qytetarët që të bashkëpunojnë dhe të raportojnë çdo rast të dyshuar apo veprim të kundërligjshëm që ndërlidhet me sigurinë dhe procesin zgjedhor, përmes numrit emergjent 192, adresës elektronike i[email protected] apo në stacionet policore më të afërta./lajmi.net/