Të paktën katër persona kanë humbur jetën dhe tetë të tjerë janë plagosur pasi një person i armatosur përplasi automjetin e tij në një kishë në Miçigan, hapi zjarr dhe më pas i vuri flakën ndërtesës.

Zyrtarët thanë se sulmi në Kishën e Jezu Krishtit të Shenjtorëve të Ditëve të Mëvonshme në Grand Blanc, një qytet rreth 100 km në veriperëndim të Detroit, ndodhi gjatë shërbesës të së dielës ku ishin të pranishëm qindra besimtarë, shkruan BBC.

I dyshuari, i identifikuar si Thomas Jacob Sanford, 40-vjeçar, nga Burton, Michigan, u qëllua për vdekje nga policia në parkimin e kishës.

Autoritetet po e hetojnë incidentin si një “akt dhune të qëllimshme”, por ende nuk dihet motivi.

Detajet e viktimave dhe hetimit

Shefi i Policisë së Grand Blanc Toënship, Ëilliam Renye, tha në një konferencë për shtyp të dielën se dy viktima vdiqën nga plagët e armës së zjarrit. Më vonë ai shtoi se dy persona të tjerë u gjetën të vdekur dhe se “disa” ende figurojnë të zhdukur, pa specifikuar numrin e saktë.

Ai konfirmoi se kisha ishte ende duke u “pastruar” të dielën në mbrëmje, pas dëmeve të mëdha të shkaktuara nga zjarri.

Si ndodhi sulmi

Sipas shefit të policisë, qindra persona ishin në shërbesë rreth orës 10:25 me orën lokale (15:25 GMT), kur i armatosuri përplasi automjetin në ndërtesë.

Sulmuesi më pas hapi zjarr me një pushkë të tipit sulmues, duke qëlluar disa herë mbi personat brenda kishës.

Policia reagoi menjëherë në vendngjarje dhe u përplas me të dyshuarin me armë zjarri, duke e “neutralizuar” atë. Sanford u vra në orën 10:33, vetëm tetë minuta pas fillimit të sulmit.

Zjarri dhe reagimi i komunitetit

“Ne ende po përpiqemi të kuptojmë saktësisht kur dhe ku filloi zjarri dhe si u shkaktua,” tha shefi i policisë në Michigan. Autoritetet besojnë se i dyshuari përdori një nxitës zjarri – më së shumti benzinë – për të ndezur flakët.

Shefi Renye lavdëroi “heroizmin” e besimtarëve, të cilët, sipas tij, strehuan fëmijët brenda kishës gjatë incidentit.