Gjatë dëshmisë së tij në Hagë, dëshmitari John Duncan tha se gjatë kohës sa ka qenë në Kosovë, nuk ka pasur asnjë dëshmi që bën të ditur ekzistencën e ndonjë Shtabi të Përgjithshëm të UÇK-së sa i përket pikëpamjes ushtarake.

“Por, në kohën që kam qenë atje nuk kam pasur asnjë dëshmi që të ekzistojë një Shtab i Përgjithshëm sipas kuptimësisë nga pikëpamja ushtarake”, tha Duncan.

Ai tha se një gjë e tillë është përmendur kryesisht nëpër deklarata politike.

“Mund të ofroj një koment; gjatë kohës time unë kam dëgjuar që të përmendet Shtabi i Përgjithshëm, por këtë në deklarata politike kryesisht”, tha ish-këshilltari i Wesley Clark.

Ai tha se përveç kësaj, nga aktakuza e ka kuptuar që një organ i tillë pretendohet se ka ekzistuar që nga vitet e ’90-ta.

“Nga aktakuza kam kuptuar që është krijuar në mes të viteve ’90-të, kur UÇK-ja ishte një organizatë tejet e ndryshme dhe shumë e vogël dhe po dëshironin që t’i jepnin tituj të mëdhenj”, u shpreh Duncan.

Ai tha se as vetë nuk ka pasur ndonjë takim me persona nga ky organ gjatë kohës sa ka qenë në Kosovë.

Me kaq përfunduan pyetjet e avokatit të Kadri Veselit, Rodney Dixon për të vazhduar më pas mbrojtja e Jakup Krasniqit e përfaqësuar nga avokati Aiden Ellis.