Kryetari i Lidhjes Demokratike të Kosovës, Lumir Abdixhiku, ka publikuar një reagim të fortë ndaj vendimit të Gjykatës Kushtetuese për vendosjen e masës së përkohshme, e cila ndalon çdo veprim parlamentar dhe formimin e Qeverisë deri më 30 shtator.

Ai e quan situatën si “masë tjetër, bllokadë tjetër”, transmeton lajmi.net.

Abdixhiku shprehet: “Një shtet i tërë i bllokuar, për një pozitë të parëndësishme partiake në Kuvendin e Kosovës. Edhe 30 ditë të tjera të humbura – minimalisht. Tridhjetë ditë të tjera pa institucione funksionale, pa ligje që bëhen, pa projekte që ecin.”

Ai përshkruan si tragjike atë që konsideron një përpjekje populiste për të mbuluar dështime politike: “Kështu ndodhë kur shkatërruesit e shtetit… për synim nuk kanë atdheun, por kauzën elektorale për një votë a dy… Në mungesë të ideve, në mungesë të projekteve… gojën plot Serbi – është lehtë. Punë për Kosovën është vështirë për ata që veç karrigën kanë synim.”

Abdixhiku thekson se LDK-ja është “e saktë”, pasi kupton rëndësinë e shtetit dhe Kushtetutës, dhe se thirrja për përballje me popullizmin mbetet e qëndrueshme: “Koha e shkatërruesve të shtetit duhet të mbarojë. Koha e shkatërruesve të shtetit po mbaron”./lajmi.net/