Kuvendi i Kosovës ka dal me njoftim në lidhje me seancën e sotshme.

Në njoftim shkruhej se seanca konstituive e Kuvendit vazhdoi sot me pikën e fundit të rendit të ditës, që ishte zgjedhja e nënkryetarëve të Kuvendit. Në fillim të seancës, deputetët mbajtën një minutë heshtje për të nderuar jetën dhe veprën e veprimtarit të çështjes kombëtare, Ilmi Ramadani, i cili ndërroi jetë ditë më parë, transmeton lajmi.net.

Me rastin e 30 gushtit – Ditës Ndërkombëtare për Personat e Zhdukur, kryetari i Kuvendit, Dimal Basha, theksoi se Kuvendi kujton mbi 1584 qytetarët e Kosovës që ende janë të zhdukur nga Serbia gjatë periudhës së vitit 1998-1999.

Ai kërkoi që të bëhet trysni ndaj Serbisë për të zbuluar vendndodhjen e të zhdukurve dhe për të hapur arkivat shtetërore, si dhe shprehu solidaritetin e Kuvendit me familjet e të zhdukurve. Basha kërkoi njëkohësisht ndëshkimin e të gjithë përgjegjësve për këto krime dhe përmbushjen e zotimeve ndërkombëtare nga Serbia për të zbuluar të vërtetën dhe drejtësinë.

Duke vijuar me procedurat e seancës konstituive, Basha njoftoi se është proceduar me zgjedhjen e nënkryetarit të Kuvendit nga komuniteti serb, duke i nënshtruar kandidatët për votim.

Sipas shortit, deputetja Miljana Nikoliq ishte e para që u nënshtrua për votim, por ajo nuk arriti të merrte votat e nevojshme në tri raundet e votimit dhe për rrjedhojë u eliminua nga gara. As dy deputetët e tjerë, Nenad Rashiq dhe Igor Simiq, nuk morën votat e mjaftueshme për të u bërë nënkryetar të Kuvendit.

Pas përfundimit të votimit, kryetari Basha theksoi se janë ezauruar të gjitha mundësitë për zgjedhjen e nënkryetarit nga pakicat serbe. Ai kujtoi se asnjëri nga kandidatët nuk ka marrë votat e nevojshme, ndërsa dy të tjerë refuzuan të jenë kandidatë. Basha tha se “ne si Kuvend nuk kemi mundësi tjetër se si të vazhdojmë sa i përket nënkryetarit që vjen nga komuniteti joshumicë serb,” dhe për këtë arsye seanca konstituive u përmbyll.

Në përfundim, ai theksoi se moszgjedhja e njërit nga nënkryetarët nuk mund të bëhet pengesë për funksionalizimin e Kuvendit dhe vazhdimin e punës. “Pas përmbylljes së seancës konstituive, Kuvendi i Republikës sonë duhet të vazhdojë punën siç parashihet me Kushtetutë,” u shpreh Basha.

Ai njoftoi gjithashtu se një mbledhje e Kryesisë do të mbahet të hënën, në orën 13:00, për të diskutuar hapat e mëtjeshëm.

Njoftimi i plotë i Kuvendit të Kosovës:

Ka vazhduar sot seanca konstituive e Kuvendit të Republikës së Kosovës, me pikën e fundit të rendit të ditës, zgjedhjen e nënkryetarëve të Kuvendit.

Në fillim të seancës deputetët mbajtën një minutë heshtje në nderim të jetës dhe veprës së veprimtarit të çështjes kombëtare, Ilmi Ramadani, i cili ndërroi jetë ditë më parë.

Në vazhdim me rastin e 30 gushtit – Ditës Ndërkombëtare për Personat e Zhdukur, kryetari Dimal Basha tha se Kuvendi i Republikës së Kosovës kujton mbi 1584 qytetarë të Republikës së Kosovës që ende janë të zhdukur me dhunë nga Serbia gjatë viteve 98/99, si një nga plagët më të rënda dhe më të dhimbshme për vendin dhe shoqërinë tonë.

“Në emër të Kuvendit të Republikës së Kosovës, shpreh dhembjen dhe solidaritetin me të gjitha familjet që ende përballen me mungesën e më të dashurve të tyre dhe që vazhdojnë të kërkojnë të vërtetën dhe drejtësinë që u takon. Kërkojmë me vendosmëri ndëshkimin e të gjithë përgjegjësve për këto krime dhe njëkohësisht i bëjmë thirrje Serbisë që t’i përmbushë zotimet ndërkombëtare, përfshirë atë të Aneksit të Ohrit të datës 18 mars 2023 dhe Deklaratën e Përbashkët të 2 majit 2023, duke treguar vendndodhjen e të zhdukurve me dhunë, si dhe duke hapur arkivat shtetërore, në bashkëpunim me Komisionin e Përbashkët për Personat e Zhdukur, i themeluar në dhjetor të vitit 2024, që mundëson identifikimin dhe kthimin e të gjithë të zhdukurve me dhunë tek familjarët e tyre”, tha në deklaratën e tij kryetari Basha, duke rikujtuar edhe miqtë tanë ndërkombëtarë se Serbia përveç se ka kryer gjenocid dhe ka vrarë mbi 10 mijë civilë të pafajshëm, edhe 26 vite më pas po i vret çdo ditë qytetarët tanë duke mos treguar për fatin e të zhdukurve me dhunë. Prandaj kryetari Basha kërkoi rritjen e trysnisë ndaj shtetit të Serbisë për të përmbushur këto detyrime me urgjencë, sepse, siç tha ai, para së gjithash është detyrim moral e njerëzor, por edhe obligim ndërkombëtar.

Duke vijuar me seancën konstituive të Kuvendit, kryetari Dimal Basha tha se do të procedohet aty ku ka mbetur në vazhdimin e kaluar, votimin për nënkryetar nga radhët e komunitetit serb, me tërheqje të shortit.

Kështu, sipas shortit, procedurës së votimit iu nënshtrua deputetja Miljana Nikoliq, e cila në tri raunde nuk arriti të marrë votat e nevojshme dhe për rrjedhojë u eliminua nga gara. Votat për nënkryetar të Kuvendit nuk i morën as dy deputetët e tjerë, Nenad Rashiq dhe Igor Simiq.

Pas përfundimit të votimit edhe për kandidatin e fundit, kryetari i Kuvendit konstatoi se janë ezuruar të gjitha opsionet për zgjedhjen e nënkryetarit të pestë, që vjen nga komuniteti joshumicë serb. Ai kujtoi se asnjëri nuk është zgjedhur nënkryetar, ku tetë prej tyre nuk kanë marrë votat e nevojshme për nënkryetar të Kuvendit, në të gjitha tentativat, ndërsa dy prej tyre kanë refuzuar të jetë kandidat për nënkryetar.

“Ne si Kuvend nuk kemi mundësi tjetër se si të vazhdojmë sa i përket nënkryetarit që vjen nga komuniteti joshumicë serb, prandaj me këtë rast konsideroj se kemi ezauruar edhe pikën e katërt të rendit të ditës të seancës konstituive dhe meqenëse nuk ka mundësi tjetër objektive se si të procedohet tutje, konsideroj që kjo seancë konstituive konsiderohet e përmbyllur”, tha kryetari Basha.

Ai konsideroi se në emër të funksionalizimit të Kuvendit dhe materializimit të rezultatit zgjedhor të 9 shkurtit, moszgjedhja e njërit nga pesë nënkryetarët apo njërit nga gjashtë anëtarët e Kryesisë nuk mund të bëhet pengesë që bllokon konstituimin e Kuvendit të Republikës së Kosovës.

“Pas përmbylljes së seancës konstituive, konsideroj që Kuvendi i Republikës sonë duhet të vazhdojë punën siç parashihet me kushtetutë, ndërkaq se si të veprohet tutje me punën tonë si Kuvend, do t’i konsultoj anëtarët e zgjedhur tanimë të Kryesisë së Kuvendit, mbledhje kjo që do të mbahet në Sallën C 301, të hënën, në orën 13:00”, theksoi kryetari Dimal Basha./lajmi.net/