Deputetët e Kuvendit të Kosovës do të mblidhen sot në një tjetër përpjekje për të përfunduar konstituimin e plotë të Kuvendit, i cili ka mbetur pezull në pikën e zgjedhjes së nënkryetarit nga komuniteti pakicë serb.

Në seancën e mbajtur më 26 gusht, deputeti i Listës Serbe, Sllavko Simiq, dështoi të zgjidhet nënkryetar i Kuvendit, pasi nuk arriti të sigurojë votat e nevojshme në tre raunde votimi. Pas këtij dështimi, kryetari i Kuvendit, Dimal Basha, vendosi që procedura të kalojë nëpërmjet shortit, siç parashihet edhe në rregulloren e Kuvendit, transmeton lajmi.net

Në votimin e organizuar përmes shortit, kandidat i vetëm nga komuniteti serb ishte Nenad Rashiq, i cili gjithashtu nuk arriti të marrë besimin e deputetëve. Sot pritet që Rashiq të kandidojë për herë të tretë dhe, sipas rregullores, kjo do të jetë tentativa e fundit për të marrë këtë post.

Kujtojmë se më 26 gusht, Dimal Basha u zgjodh kryetar i Kuvendit me 73 vota për, 30 kundër dhe tetë abstenime. Po atë ditë u zgjodhën edhe nënkryetarët nga tri partitë më të mëdha shqiptare: Albulena Haxhiu, Vlora Çitaku dhe Kujtim Shala, si dhe Emilia Rexhepi nga komunitetet tjera pakicë, përmes sistemit të rotacionit.

Pas dy dështimeve radhazi për të zgjedhur nënkryetarin nga komuniteti serb, edhe sot pritet që procesi të vazhdojë përmes procedurës së shortit, siç përcakton rregullorja e Kuvendit./lajmi.net/