Kryeministri izraelit Benjamin Netanyahu nuk përjashtoi mundësinë e sulmit ndaj udhëheqësit suprem të Iranit, Ali Khamenei.

Në deklaratë për ABC News, Netanyahu tha se “Shikoni, ne po bëjmë atë që duhet të bëjmë. Nuk do të hyj në detaje, por ne kemi synuar shkencëtarët e tyre më të mirë bërthamorë. Ata janë në thelb ekipi bërthamor i Hitlerit“.

Më tej ai vazhdoi duke thënë “Kjo nuk do ta përshkallëzojë konfliktin, do ta përfundojë konfliktin“, theksoi gjithashtu Netanyahu për planet për të neutralizuar udhëheqësin iranian.

Netanyahu tregoi gjithashtu se nuk po i merr seriozisht mesazhet e Iranit se dëshiron t’i japë fund konfliktit dhe të kthehet në bisedimet bërthamore.

“Ata duan të vazhdojnë të bëjnë këto biseda të rreme në të cilat gënjejnë, mashtrojnë, mashtrojnë Shtetet e Bashkuara. Dhe, e dini, ne kemi informacione shumë të besueshme për këtë”, theksoi ai, transmeton tch.

Irani akuzon Izraelin për goditjen e një spitali në perëndim të vendit, dhe ministria e shëndetësisë e Iranit thotë se të paktën 224 persona janë vrarë nga sulmet izraelite që nga e premtja.

Gjatë natës, raketat iraniane depërtuan përsëri në sistemin mbrojtës të Kupolës së Hekurt të Izraelit – numri i të vrarëve në Izrael që nga e premtja është rritur në 24.