“Nuk ka kuorum kuvendi për me vazhdu…”- Kjo shprehje u dëgjua shumë shpesh në Kuvendin e Kosovës gjatë mandatit të këtij legjislativi, e cila këtë vit madje u shndërrua në klishe.

Për pasojë të mungesës së kuorumit shumë projektligje mbetën pa u votuar në lexim të dytë, andaj monitoruesit e kuvendit vlerësojnë se gjatë këtij viti qeveria nuk përmbushi më shumë se 50 përqind të agjendës legjislative.

“Në asnjërin vit të qeverisë Kurti, nuk është përmbushur më shumë se 50 përqind e agjendës legjislative, po flasim pra as në vitin 2021, 2022, 2023 e fatkeqësisht deri më tash as në vitin 2024 nuk është përmbushur agjenda legjislative më shumë se 50 përqind. Një çështje të tillë ose një përmbushje e agjendës legjislative e kemi konsideru që ka ardh si shkak i mungesës së planifikimit adekuat, për shkak të mungesës së kapaciteteve. Por gjithsesi ne e shohim si një dështim të qeverisë për të përcjell me efikasëshmëri programin legjislativ”, tha Naim Jakaj nga IKD-ja.

Lëvizja “FOL” e cilësoi joserioze sjelljen e deputetëve në kuvend, e cila lë pasoja të shumanshme.

“Qytetarët janë ata që më së shumti preken nga vendimet e kuvendit, pasi që ata janë të thirrur të punojnë për të mirën e popullit dhe duke pasur parasysh që ne vazhdimisht kemi pasur shtyrje të seancave dhe mosmiratim të projektligjeve të ndryshme dhe mosvotimin e marrëveshjeve ndërkombëtare dëmet më së shumti i pëson populli”, tha për rtv21 Viona Bunjaku nga lëvizja “FOL”

Qarqet analitike ia shohin për të madhe si pushtetit ashtu edhe opozitës për sjelljet e tyre që burojnë nga inatet politike, që dëmtojnë interesat e qytetarëve të Kosovës.

“Kjo legjislaturë e përfundoj mandatin e saj por është legjislatura më e dobët prej që prej shpalljes së Pavarësisë së Kosovës. Kemi parë një injorim, një përbuzje nga deputetët të cilët kanë qenë të thirrur të punojnë dhe të marrin pjesë në seanca. Ne e dimë shumë mirë që një numër i madh i seancave kanë dështuar në mungesë të kuorumit. Ka qenë një moskordinim total për shumë tema. Kemi shumë ligje të kthyera nga Gjykata Kushtetuese për shkak që kjo tregon që deputetët nuk e kanë marrë me seriozitet këtë punë”, tha për rtv21 Shemsi Jashari, analist politik.

Dukuria e mungesës së kuorumit ishte shprehur dukshëm edhe në vitit 2023 dhe për pasojë, dhjetëra pika dhe çështje që nuk u trajtuan janë bartur për shqyrtim në sesionin e sivjetmë të kuvendit.