Serwer: Zbutja e Serbisë nuk po funksionon, SHBA-ja duhet të jetë më e vendosur ndaj ambicieve irredentiste të Vuçiqit
Profesori amerikan Daniel Serwer, njohës i thellë i çështjeve të Ballkanit Perëndimor, ka folur ndaj masave të fundit të presidentit serb Aleksandar Vuçiq kundër Kosovës. Të premten, Vuçiq njoftoi masa që synojnë të minojnë pavarësinë e Kosovës, duke shfaqur dëshirën për të rimarrë të paktën një pjesë të saj. Megjithatë, Ambasada Amerikane në Beograd vazhdon…
Lajme
Profesori amerikan Daniel Serwer, njohës i thellë i çështjeve të Ballkanit Perëndimor, ka folur ndaj masave të fundit të presidentit serb Aleksandar Vuçiq kundër Kosovës.
Të premten, Vuçiq njoftoi masa që synojnë të minojnë pavarësinë e Kosovës, duke shfaqur dëshirën për të rimarrë të paktën një pjesë të saj.
Eksperti i politikave ballkanike, Jasmin Mujanoviç, shprehu në Twitter qëndrimin e tij kritik ndaj qasjes së SHBA-së në rajon.
“Politika e SHBA-së në Ballkanin Perëndimor është e qartë si balta. SHBA mbështet Vuçiqin pavarësisht lidhjeve të tij pro-ruse, ndërsa kundërshton Kurtin, edhe pse ai mban qëndrime properëndimore.”
Mujanoviq e kritikoi më tej administratën amerikane për qasjen e saj ndaj vendeve si Bosnja dhe Mali i Zi, duke thënë se SHBA kundërshton përfaqësuesit e Vuçiqit në Bosnje, ndërsa përkrah ata në Mal të Zi që rrëzuan një qeveri pro-NATO.
Serwer gjithashtu theksoi nevojën për një qasje më të qartë dhe koherente nga SHBA.
“Objektivat afatgjata të SHBA-së në Ballkan duhet të jenë të qarta: qeverisje demokratike dhe sovranitet pa kërcënime të forcës,” tha ai.
Sipas Serwer, politika amerikane aktuale është jo koherente dhe bie ndesh me qëllimet e saj afatgjata në rajon.
Në lidhje me zhvillimet në Kosovë, Serwer vuri në dukje se kryeministri Albin Kurti, megjithëse është në anën e Perëndimit, shpesh vepron pa konsultuar SHBA-në dhe BE-në.
“Kurti është në rreshtim me Perëndimin, por ai duhet të tregojë më shumë përkujdesje në veprimet e tij për të mos irrituar serbët e Kosovës dhe Beogradin,” tha Serwer.
Në përfundim, Serwer dhe Mujanoviq shprehen se qasja aktuale e SHBA-së ndaj Serbisë dhe Kosovës nuk funksionon dhe kërkojnë një rivendosje të politikës amerikane në rajon.
“Zbutja e Serbisë nuk po funksionon. SHBA duhet të jetë më e vendosur ndaj ambicieve irredentiste të Vuçiqit dhe të përkrahë fuqishëm Kosovën dhe vendet e tjera që kërkojnë integrimin perëndimor,” përfundoi Serwer. /Telegrafi